УИХ-ын дарга Г.Занданшатар Японы Олон улсын хамтын ажиллагааны байгууллага (ЖАЙКА)-ын Монгол дахь төлөөлөгчийн газрын дарга Э.Тамураг хүлээн авч уулзжээ. Өнгөрсөн тавдугаар сард УИХ-ын дарга Г.Занданшатар Япон улсын хөгжил, шинэтгэлийн бодлого, түүний туршлагын талаар хамтарсан хэлэлцүүлэг зохион байгуулж, цаашид төлөвлөгөө гарган ажиллах саналыг хатагтай Э.Тамурад тавьсан байна. Энэ удаагийн уулзалтаар “Япон лугаа адил хөгжье” санаачилгын хүрээнд болох цуврал хэлэлцүүлгийн сэдвүүдийн талаар санал солилцжээ.

УИХ-ын дарга Япон улсын хөгжлийн туршлагыг судлах ач холбогдолтойг онцлоод “Япон лугаа адил хөгжье” санаачилгыг бодитой ажил болгох, тодорхой чиглэлийн шинэтгэлийн хүрээнд хийх ажлуудаа төлөвлөж, салбар хоорондын уялдаа холбоог сайтар ханган ажиллаж байгааг хэлсэн байна.

Цуврал хэлэлцүүлгийн эхний хэлэлцүүлгийг ирэх есдүгээр сард явуулах саналтай байгаа бөгөөд уг хэлэлцүүлэгт ЖАЙКА-ийн ерөнхийлөгч оролцож илтгэл тавихаар болжээ.