Өнөөдрөөс эхлэн 16-17 насны хүүхдүүд эцэг, эхийн зөвшөөрөлтэйгээр вакцинжуулалтад хамрагдах боломжтой боллоо. Энэ талаар ЭМЯ-ны хэвлэлийн төлөөлөгч Б.Ууганбаяр,

"Өнөөдрийн байдлаар Монгол улсын хувьд хүүхдүүдийг вакцинжуулж эхлээгүй хэдий ч хэрэв эцэг, эхчүүд хүсвэл вакцинжуулалтын цэг дээр очоод файзер вакциныг 16-17 насны хүүхдэд хийлгэх боломжийг нээх шийдвэрийг гаргаад байна. Иймээс өнөөдрөөс эхлэн жирэмсэн эмэгтэйчүүд болон 16-17 насны хүүхдүүд маань файзер вакцинд хамрагдах боломжтой. Цаашдаа 12-17 насны хүүхдүүдийг хэрхэн вакцинжуулах талаар тодорхой шийдвэрүүд гарна" гэв.

Мөн тэрбээр, "Хэрэв та вакцинжуулалтад хамрагдах сайн дурын хүсэлтэй жирэмсэн эмэгтэй бол moh.gov.mn сайтад нэвтэрч жирэмсний вакцинжуулалтын цаг аваад вакцинжуулалтад хамрагдах боломжтой. Улсын хэмжээнд 40 мянга орчим, Улаанбаатар хотод 10 мянга орчим жирэмсэн эмэгтэй байгаа гэсэн судалгаа бий. Жирэмснээс хойш 14-36 долоо хоногийн дотор I, II тунгаа тариулах боломжтой хэмээн салбар мэргэжлийн зөвлөл гаргасан байгаа" гэв.