Сэлэнгэ аймгийн Алтанбулаг хилийн боомтоор нэвтэрсэн иргэдээс шинжилгээ авахад сэжигтэй нэг тохиолдол илэрчээ. Иймд Халдварт өвчин судлалын үндэсний төв рүү өнөө өглөө шилжүүлсэн байна. Тодруулбал, ОХУ-аас 43 иргэн энэ сарын 25-нд  хилээр нэвтэрч,  Дархан-Уул аймагт тусгаарлагджээ. Иргэдээс өчигдөр covid-19 халдвар илрүүлэх шинжилгээ авсан байна. Шинжилгээний хариу 22:00 цагийн үед гарч сэжигтэй тохиолдол илэрсэн тул ХӨСҮТ рүү шилжүүлэхээс өмнө аймгийн нэгдсэн эмнэлгийн халдвартын тасагт шилжүүлсэн байна.

Тухайн иргэн Монгол Улсын иргэн гэдгийг аймгийн Шуурхай штабаас мэдээлэв. Тус штабын мэдэгдэлд дурдснаар  ОХУ-аас ирсэн 43 иргэний 15 нь тус улсын харъяат иргэн 9 том хүн, зургаан хүүхэд байгаа юм. Харин үлдсэн 27 нь Монгол Улсын иргэн бөгөөд нэг хүүхэд байжээ. Тухайн иргэдээс явуулын шинжилгээний баг тусгаарлалтад байсан “Гранд Яак” зочид буудалд очиж шинжилгээ авсан тул иргэдийг санаа зовох зүйлгүй хэмээн анхааруулжээ.