Өнгөрсөн оны аравдугаар сарын 17-нд УИХ-ын чуулганаар Ерөнхий сайд Г.Занданшатарыг огцруулах асуудлыг хэлэлцэж, УИХ-ын 95 дугаар тогтоолыг баталсан байдаг. Гэвч энэ нь Үндсэн хуулийн холбогдох заалтуудыг зөрчсөн гэдгийг ҮХЦ-ийн Их суудлын хуралдаанаар хэлэлцэн шийдвэрлэсэн юм. Улмаар дээрх УИХ-ын чуулганы хуралдааныг удирдсан Х.Булгантуяаг УИХ-ын дэд даргаас огцруулсан бөгөөд арваннэгдүгээр сарын 24-нд прокуророос яллагдагчаар татсан байдаг.
Энэ асуудлаар зарим гишүүдийг дуудаж тайлбар авсан байна. ТББХ-ны дарга Ц.Сандаг-Очироос энэ талаар тодруулахад "Х.Булгантуяа гишүүнийг хэрэгт холбогдуулан шалгасантай холбоотойгоор надаас ТББХ-ны даргын чинь хувьд тайлбар мэдүүлэг авна гээд нэг удаа авсан. Би тайлбараа өгсөн. Та нар өргөн барьчхаад ТББХ дээр яагаад дэмжээгүй юм бэ гэдэг агуулгаар тайлбар авч байх шиг байсан. УИХ-ын гишүүд аливаа хэлэлцэж байгаа асуудалд хэрхэн яаж саналаа өгөх нь тухайн гишүүний бүрэн эрхийн асуудал гэдэг тайлбараа өгсөн" гэв.
