Улаанбурхан, улаанууд өвчний эсрэг нэмэлт дархлаажуулалтад 10-15 насны хүүхдүүдийг хэрхэн яаж хамруулж байгаа талаар ЭМЯ-ны НЭМБХГ-ын Дархлаажуулалтын асуудал хариуцсан мэргэжилтэн Б.Мөнхзул мэдээлэл хүргэлээ. Тэрбээр "Эцэг, эхчүүдээс манай хүүхдийг хамрагдах эсэхийг асуухгүйгээр вакцинд хамруулсан байна гэх санал гомдлууд 11-11 төвд ирж байгаа. Эрүүл мэндийн байгууллагын зүгээс тухайн эцэг, эхэд мэдэгдэхгүйгээр дархлаажуулалтад хамруулсан асуудал байхгүй. Дархлаажуулалтын тухай хуульд хүүхэд болон ямар нэгэн шийдвэр гаргах боломжгүй бол эцэг, эх асран хамгаалагчийн зөвшөөрлийн дагуу вакцинд хамруулна гэж заасан байдаг. Тэгэхээр энэ хүрээнд бүх өрх, сумын эрүүл мэндийн төвүүд дархлаажуулалтыг зохион байгуулж байгаа" гэлээ.