Засгийн газраас татварын багц хуулийн төслийг УИХ-д өргөн мэдүүллээ. Ингэснээр иргэдийн НӨАТ, хувь хүний орлогын албан татварыг 2 их наяд төгрөгөөр, аж ахуйн нэгжүүдийн татварын ачааллыг 700 орчим тэрбум төгрөг буюу нийт 2.7 их наядын татварыг үе шаттай бууруулахаар тооцжээ.

Мөн иргэдийн сарын 500 мянган төгрөгийн орлогыг 100 хувь татвараас хөнгөлж буцаан олгохоор,

-Хариуцлагатай татвар төлөгч НӨАТ төлөх хугацааг 2 хүртэлх сараар хойшлуулж болохоор,

-Хил дээр импортын НӨАТ хураахгүй 2 сарын дараа төлөх боломж өгөхөөр,

-Тайлангаа 2 жилийн хугацаанд залруулах эрх олгохоор,

-Жижиг, дунд бизнесийг дэмжих, татварын суурийг тэлэх зорилгоор 90 хувийн татварыг хөнгөлж 1 хувийн орлогын татвар төлдөг босго 1.5 тэрбум байгааг 2.5 тэрбум болгон нэмэгдүүлэхээр,

-6-10 тэрбумын ашигтай компаниудын татварыг 10 хувиар бууруулахаар,

-1 хувийн татварын хялбаршуулсан горимыг 400 сая төгрөг хүртэл орлоготой аж ахуй эрхлэгчдэд нээлтэй болгож хамрах хүрээг нэмэгдүүлэхээр тус тус тусгасан байна.

Түүнчлэн 176 мянга гаруй иргэдийн санал дээр үндэслэн боловсруулсан Татварын багц хуулийн шинэчлэл нь иргэн бүрийн халаас, ААН бүрийн үйл ажиллагаанд бодит дэмжлэг болно гэж үзжээ.