Өнөөдөр сансар огторгуйд болох чухал үйл явдал орон орны астрономичдын анхаарлын төвд байна.

Тодруулбал, 400 орчим жилийн дараа нарны аймгийн хамгийн том хоёр гараг болох Бархасбадь, Санчир хоёр дэлхийтэй нэг шугаманд зэрэгцэх юм. “Их давхцал” гэж нэрлэж байгаа энэ үзэгдлийг дэлхийн ихэнх хэсгээс хүмүүс нүдээрээ шууд ажиглах боломжтой.

Өнөө орой нар жаргаснаас хойш хагас цагийн дараа тэнгэрийн хаяаны баруун өмнөд хэсэгт гарагуудын давхцал ажиглагдах юм. Энэ үед тэнгэрт хурц гэрэлтэй нэг том од бий болсон мэт харагдах гэнэ. Экваторын шугамд ойртох тусам энэ үзэгдэл тэнгэрийн хаяанаас дээш өндөрт ажиглагдах бол хойшлох тусам тэнгэрийн хаяанд ойрхон ажиглагдана.

Хамгийн сүүлд 1623 онд Бархасбадь, Санчир гарагууд дэлхийгээс давхцаж харагдаж байжээ. Дараагийн ийм үзэгдэл 2080 онд тохиох гэнэ. Энэ удаагийн ”Их давхцал” дэлхийн бөмбөрцгийн хойд хагаст өдөр уртасаж, шөнө богиносож эхлэх өдөртэй давхцаж байна.

Хэрвээ телескоп ашиглавал Бархасбадь, Санчир гарагуудын дагуулуудыг харах боломжой. Энэхүү үзэгдлийг нүдээр харах боломжгүй хүмүүст зориулж зарим судалгааны байгууллагууд интернэтээр шууд дамжуулахаар болжээ. Монголын цагаар 17:30 орчимд энэхүү үзэгдлийг ажиглах боломжтой байна.

Эх сурвалж: The Guardian