МАН-ын Бага хурлын 8-р хуралдааны үеэр Бага хурлын гишүүд намын даргад нэр дэвшигчдээсээ асуулт асууж, үг хэлсэн.
Үүний төгсгөлд Ерөнхий сайд Г.Занданшатар үг хэлжээ. Тэрбээр “Нүүрсний хэргүүд өмнөх Засгийн газрын үед боогдсон байсан. Би хууль хяналтынханы ажилд хөндлөнгөөс оролцох эрхгүй. Хууль хяналтынхан ажлаа л хийж буй гэж ойлгож байгаа. Нүүрсний хулгай, ногоон автобус зэрэг хэргүүдээр нүүрээ будаад 2027, 2028 оны сонгуульд орж болохгүй.
Ард түмэн талцал хуваагдал, нэг асуудлыг нөгөө асуудлаар дарж хоосон дайсан, хиймэл бэрхшээл үүсгэдэг төр удирдах арга барилаас залхаж цөхөрсөн. Өрсөлдөгч хүчин “МАН-ын даргын ёс зүйн өндөрлөг намсаасай, Тусгаар тогтнолын ордны цагаан өнгө нүүрсний утаанд харлаасай” гэж тэсэн ядан хүлээж байна.
