Засгийн газраас ирэх оны төсвийн төслийг УИХ-д өргөн бариад байна. Тэгвэл энэ удаагийн төсвийн төсөлд "Шинэ хоршоо-чинээлэг малчин хөдөлгөөнтэй холбоотой төсвийг дараах байдлаар тусгажээ.

Тодруулбал, 2026 онд шинээр 500 тэрбум төгрөгийн хөнгөлөлттэй зээлийг олгохоор төлөвлөж, зээлийн хүүгийн дэмжлэгт 108.9 тэрбум төгрөгийг төрөөс хариуцан төлөхөөр төсвийн төсөлд тусгасан байна.

Ташрамд дурдахад, “Шинэ хоршоо-Чинээлэг малчин” үндэсний хөдөлгөөний хүрээнд хоршооны гишүүн малчдад зориулж 50.0 сая хүртэл төгрөгийн зээлийг олгож, нийт зээлийн хүүгийн 12 нэгж хувийг төрөөс хариуцан төлж байна. Тус хөдөлгөөний хүрээнд 2024-2025 онд нийт 26,759 хоршооны гишүүн малчинд 841.9 тэрбум төгрөгийн зээлийг олгоод байгаа юм.