Төгрөгийн эсрэг гадаад валютын ханш чангарч байгаа нь иргэдийн үндэсний мөнгөн тэмдэгтэд итгэх итгэл суларч байна. Өөрөөр хэлбэл, иргэд төгрөг суларч гадаад валют чангарна гэсэн хүлээлттэй байгаа нь хадгаламжаар илэрдэг. Үндэсний статистикийн хорооны дөрөвдүгээр сарын нийгэм, эдийн засгийн үзүүлэлтээр төгрөгийн хадгаламж өмнөх сараас 0.9 хувиар буурсан бол валютын хадгаламж мөн 5.3 хувиар өсжээ.

Дөрөвдүгээр сарын эцэст төгрөгийн хадгаламж 21.9 их наяд төгрөгт хүрч өмнөх оны мөн үеэс 3.3 хувиар өссөн ч өмнөх сараас 195.6 тэрбум төгрөгөөр буурсан дүнтэй байгаа юм. Хадгаламжийн 87.4 хувь нь буюу 19.2 их наяд төгрөг нь иргэдийн хадгаламж бол 12.6 хувь буюу 2.8 их наяд төгрөг нь аж ахуйн нэгжийн хадгаламж байна. Мөн валютын хадгаламж 5.2 их наяд төгрөгт хүрч, өмнөх оны мөн үеэс 20.1 хувиар буюу 874.4 тэрбум төгрөгөөр, өмнөх сараас 5.3 хувь буюу 261.4 тэрбум төгрөгөөр тус тус өссөн байна.