5000 км зам туулахаар Алтай таван богдоос эхлэн гүйж яваа ахлах ахлагч Э.Даваажамц, дэд ахлагч Б.Буянхишиг нар 19 дэх хоногтоо 800 гаруй км замыг туулжээ. Гүйгчдийг өнөөдөр Говь-Алтай аймгийн Алтай хотод Батлан хамгаалах яамны "Алдар" спорт хорооны дарга, Монгол Улсын Хөдөлмөрийн баатар, хурандаа Г.Өсөхбаяр тэргүүтэй "Алдар"-ынхан хүлээн авч, аян замдаа саадгүй гүйж, одоо үлдээд байгаа 4200 км замыг туулсных нь дараа дахин уулзахаар товлов.

Хурандаа Г.Өсөхбаяр цэргийн хүн спорт хоёр салшгүй холбоотой байх ёстойг онцолж, энэхүү зарчмыг биеэр үлгэрлэж яваа гүйгчдэд амжилт ерөөж байв.

Мөн тэрээр мянга мянган эмэгтэй цэргийн алба хаагчдыг төлөөлж яваа дэд ахлагч Б.Буянхишигийн тэсвэр хатуужил, эр зоригт онцгойлон баяр хүргэлээ.