Монгол улс, БНСУ-ын Байгаль орчны яамдын хамтын ажиллагааны хүрээнд буцалтгүй тусламжаар 21 аймгийн Цаг уур, орчны шинжилгээний төвүүдийг агаарын чанарын автомат станцтай болгох ажлыг эхлүүллээ. Анхны автомат станцыг Архангай аймагт суурилуулсан бөгөөд 24 цаг, 365 хоног тасралтгүй ажиллах боломжтойг онцолж байна. Тус автомат станц нь хүхэрлэг хий, азотын ислүүд, байгаль орчны суурь үзүүлэлтүүд, нарийн тоосыг хэмжинэ. Өнгөрсөн хугацаанд 8, 12, 20 цагуудад механик байдлаар төв суурин газруудын агаарын чанарыг хэмждэг байсан бол өнөөдрөөс эхлэн бодит цагийн хэмжилтээр минут тутамд тооцоолох боломжтой болжээ.

Агаарын чанарыг хэмждэг автомат станцыг хүлээлгэн өгөх үйл ажиллагаанд БОУАӨ-ийн сайд С.Одонтуяа, ЦУОШГ-ын дарга Э.Баттулга, Архангай аймгийн Засаг дарга Б.Цэрэннадмид болон аймгийн Байгаль орчны салбарын удирдлага, мэргэжилтнүүд оролцлоо. Хүн амын эрүүл аюулгүй орчинд амьдрах, сөргөөр нөлөөлөх хүчин зүйлийг хэмжих, хяналт тавих боломж бүрдэж, технологийн том дэвшил гарч байгааг онцолж байна.

БОУАӨ-ИЙН САЙД С.ОДОНТУЯА: 21 АЙМГИЙГ АГААРЫН ЧАНАРЫГ ХЭМЖДЭГ АВТОМАТ СТАНЦТАЙ БОЛГОСНООР ОРЧНЫ ХЯНАЛТ БҮРЭН ХИЙГДЭХ БОЛОМЖТОЙ БОЛНО

Монгол Улсын иргэд, УИХ, Засгийн газрын хувьд тулгамдсан асуудлын нэг нь агаарын бохирдол. Агаарын чанарыг 365 хоног тасралтгүй хэмждэг багаж, станцтай болж байгаад баяртай байна. БНСУ-ын Засгийн газар болон оролцогч талуудад талархсанаа илэрхийлье. Байгаль орчин, уур амьсгалын өөрчлөлтийн яам “Стандарттай байгаль орчин” хөтөлбөрийг хэрэгжүүлэн ажиллаж байна. Аймгийн төвүүд агаарын чанарыг хэмжих багажгүйгээс болж стандартыг мөрдүүлж чаддаггүй байсан. Стандартаа мөрдөхөд чухал ач холбогдолтой станцыг бид хүлээж авлаа. Мөн Цаг уур, орчны шинжилгээний байгууллагууд зөвхөн хэмждэг, шинжилдэг байсан бол энэ цаг мөчөөс эхлэн хяналт тавих механизмуудаа ажиллуулж эхэлнэ. Орчны хяналт бүрэн утгаараа хийгдэх боломжтой болж байна. Энэхүү автомат станцыг 21 аймагт суурилуулна. Архангай аймгийн дараа Хэнтий аймагт суурилуулах ажил хийгдэнэ. Агаарын чанарыг хэмждэг автомат станцын багаж Завхан, Увс аймаг руу ачигдсаныг ч дуулгахад таатай байна. Хөвсгөл, Орхон, Дархан -Уул аймгууд тавдугаар сар гэхэд агаарын чанарыг хэмждэг автомат станцтай болно.

ЦУОШГ-ЫН ДАРГА Э.БАТТУЛГА: 90 ЖИЛИЙН ДАРАА АГААРЫН ЧАНАРЫГ ХЭМЖДЭГ АВТОМАТ СТАНЦТАЙ БОЛЖ, АГААРЫН ЧАНАРЫГ ХЯНАХ НЭГДСЭН СИСТЕМТЭЙ БОЛОХ ТЕХНОЛОГИЙН БОЛОМЖ БҮРДЭЖ БАЙНА

Орчны шинжилгээний салбарт түүхэн мөч тохиож байна. Монгол Улсад 1936 онд анхны долоон цаг уурын өртөө байгуулагдаж байсны нэг нь Архангай аймгийн Ус цаг, уур орчны шинжилгээний төв юм. 90 жилийн дараа агаарын чанарын автомат станцтай болж байгаа нь Цаг уур, орчны шинжилгээний газрын хувьд технологийн том дэвшил болохоос гадна орчны хяналтын чиг үүргийг хэрэгжүүлэх боломжийг нээж байна. Угсралтын явцад мэргэжилтнүүдийг сургаж, цахим сургалтыг зохион байгуулснаас гадна БНСУ-д үйлдвэр дээр нь сургахаар төлөвлөсөн. Аймгийн төвүүдэд нүүрс, шатах төрлийн материалуудаас ялгарч байгаа бохирдол болон авто тээврийн хэрэгслээс ялгарч байгаа бохирдлыг хэмжиж чадсанаараа хянах, тохируулга хийх, стандартаас давсан бохирдол ялгаруулж байгаа тохиолдолд үйл ажиллагааг нь зогсоох, шаардлага хүргүүлэх боломжтой болж байна.