Хөдөлмөрийн аюулгүй байдал, эрүүл ахуйн тухай хууль, дүрэм, журмыг хэрэгжүүлэх үйл ажиллагааг эрчимжүүлэх, ажлын байрны эрүүл, аюулгүй орчныг бүрдүүлэх зорилготой Хөдөлмөрийн аюулгүй байдал, эрүүл ахуйн аяны нээлт өнөөдөр /2025.04.02/ боллоо. Хөдөлмөрийн аюулгүй байдал, эрүүл мэндийн салбарт хууль, эрх зүйн орчныг сайжруулах, цахим шилжилтийг хэрэгжүүлэх, дэд бүтцийг хөгжүүлэх, тусламж, үйлчилгээг сайжруулах, эрдэм шинжилгээ, судалгаа, статистикийг хөгжүүлэх, мэргэжлийн хүний нөөцийг бэхжүүлэх, хяналтын тогтолцоог сайжруулах ТОГТОЛЦООНЫ ШИНЭЧЛЭЛИЙГ үе шаттай хэрэгжүүлж байна.

Энэ жилийн тухайд Олон Улсын хөдөлмөрийн байгууллагаас ХӨДӨЛМӨРИЙН АЮУЛГҮЙ БАЙДАЛ, ЭРҮҮЛ МЭНДИЙН ХӨГЖИЛ: ХИЙМЭЛ ОЮУНЫ ХЭРЭГЛЭЭ БА ЦАХИМЖИЛТ уриан дор хөдөлмөрийн аюулгүй байдал, эрүүл ахуйн аяныг орон даяар өрнүүлж байна.

Манай улсад 2024 онд үйлдвэрлэлийн осол, хурц хордлогод 809 хүн өртсөн нь өмнөх оноос 2 дахин өсжээ.

Үйлдвэрлэлийн осол, мэргэжлээс шалтгаалсан өвчний тохиолдол уул уурхай, барилга, зам, тээврийн салбарт хамгийн өндөр байна. Аяны хүрээнд 1-р улиралд эрчим хүч, 2,3,4-р улиралд уул уурхай, барилга, зам, тээвэр буюу эрсдэл өндөр салбарт хөдөлмөрийн аюулгүй байдлыг хангах, эрүүл мэндийн стандартын хэрэгжилтийг сайжруулах чиглэлээр төлөвлөгөөт ажлууд хийнэ.