Хуульзүйн байнгын хороо өнөөдөр 13.00 цагт хуралдана. Хуралдаанаар Хүний эрх, эрх чөлөөг хангахтай холбоотой зарим хуульд нэмэлт, өөрчлөлт оруулах тухай хуулийн төсөл тэргүүтэй асуудлыг хэлэлцэхээр байгаа юм.

Харин эх сурвалжийн мэдээлж буйгаар, хуралдааны хэлэлцэх асуудлын жагсаалтад багтаагүй ч АТГ-ын дарга З.Дашдавааг улираан томилох асуудлыг оруулж ирж хэлэлцүүлэхээр болжээ.

З.Дашдаваагийн хувьд АТГ-ын даргаар 2019 оны тавдугаар сард томилогдсон бөгөөд түүний бүрэн эрхийн хугацаа энэ онд дуусаж байгаа юм. Үүнтэй холбоотойгоор түүнийг улираан томилох асуудал яригдаж байгаа бөгөөд Авлигын эсрэг хуулийн 21.4-д Авлигатай тэмцэх газрын дарга, дэд даргыг нэг удаа улируулан томилж болно хэмээн заасан байдаг.

Ташрамд дурдахад, өнөөдрийн Засгийн газрын хуралдаанаар Ерөнхий сайд Л.Оюун-Эрдэнэ АТГ-ын дарга З.Дашдавааг бүрэн эрхийнхээ хүрээнд улираан томилох шийдвэр гаргаснаа танилцуулж, сайд нарын саналыг сонсжээ. Байнгын хороодоор хэлэлцүүлэгдсэний дараагаар эл асуудал УИХ-ын чуулганаар орох юм.