"Ноорог" медиагийн залуусыг цагдаагийн байгууллагад аваачиж, мэдүүлэг авснаас хойш хэдийнэ долоо хоног өнгөрчээ. Мөн мөрдөн шалгах ажиллагаатай холбогдуулан тэдгээрийн гар утас, HARD зэргийг хурааж аваад, өнөөдрийг хүртэл буцааж өгөөгүй гэх.

Түүнчлэн, нэг ажилтныг нь шүүхийн шийдвэрээр цагдан хориод байгаа юм. Тэгвэл өчигдөр /2025.03.24/ ажил тарахтай зэрэгцэн УИХ-ын Хууль зүйн байнгын хороо хуралдаж, хэвлэн нийтлэх эрх чөлөөнд халдсан байж болзошгүй гэж үзэж буй асуудлын талаар ХЗДХ-ийн сайд О.Алтангэрэлийн мэдээллийг сонссон юм. Тэгвэл тус хуралдааны үеэр байнгын хорооны гишүүд ямар байр суурь илэрхийлсэнийг багцлан хүргэж байна.

-Г.Дамдинням: Хэвлэлийн эрх чөлөө гэдэг бол Монголын ард түмний эрх чөлөө-

УИХ-ын гишүүн Г.Дамдинням "О.Алтангэрэл сайд ЦЕГ-ын хэвлэлийн албаны дарга шиг прокурорын зөвшөөрөлтэй мэдэгдэхгүй баахан мэдээллийг гаргаж тавиад дайрсан байна. Энэ асуудлыг эхлээд байнгын хороо дээр сонсох саналтай байна. Хэвлэлийн эрх чөлөө гэдэг бол Монголын ард түмний эрх чөлөө юм.

Хэрэгт холбогдсон хоёр хүнийг нь л авч явна биз. Яахаараа наймууланг нь шөнөжин байцаадаг юм бэ. 126 гишүүний нэг нь хэрэгт холбогдвол нэг байгууллагад ажилладаг гээд бүгдийг нь байцаах юм уу" гэсэн бол сайд О.Алтангэрэл "Шөнөжин байцаагаагүй. Үзлэг, нэгжлэг хийх үед ГЭРЧЭЭР БАЙЛЦУУЛСАН" гэх хариултыг өгсөн юм.

П.Сайнзориг: УИХ-ын гишүүд хууль сахиулах байгууллагын үүдэнд очиж улс төр хийдгээ боль

УИХ-ын гишүүн П.Сайнзориг "УИХ-ын гишүүд Хуульзүйн сайдыг давж, хууль сахиулах байгууллагын үүдэнд очиж улс төр хийдгээ боль. Бас “Миний өрөөнд цагдаагийн даргыг дууд, тэрийг дууд” гэж байнгын хороо болон бүлгийн чатад бичдэгээ боль.

Сүүлийн үед ХЗДХ-ийн сайд чинь ЗГ-ын бүрэн эрхэд халдсан, дураараа дүрэм журмуудыг хүчингүй болгосон, цагдаагийн байгуулагын өмнөөс мэдээлэл хийж хэргийн материалыг задалсан гээд маш олон зүйл дээр хууль ЗӨРЧЛӨӨ" гэж сайд О.Алтангэрэлд шүүмжлэлтэй хандаж байлаа.

Мөн тэрбээр "Нийгэмд болж буй үйл явдлууд дээр цагдаагийн байгууллага руу довтолж, үнэн худал нь мэдэгдэхгүй УЛС ТӨР ХИЙДГЭЭ БОЛЬ" гэсэн юм.

С.Эрдэнэболд: "Ноорог"-ийн залуусыг шалгаж эхэлсэн зүйл анги нь сарничихсан

УИХ-ын гишүүн С.Эрдэнэболд "Ноорог”-ийн залуусыг анх Эрүүгийн хуулийн 19.9 буюу үндэсний эв нэгдлийн эсрэг гэх зүйл ангиар шалгаж байна гэж эхэлсэн. Гэвч өнөөдөр энэ зүйл заалт нь сарничихсан юм шиг харагдаад байна" гэж ХЗДХ-ийн сайдаас тодруулахад "Ийм зүйл ангиар шалгаж байгаа гэх ямар ч мэдээлэл ХЗДХ-ийн сайд надад өнөөдрийг хүртэл ИРЭЭГҮЙ, БАЙХГҮЙ. Хууль бус мөрийтэй тоглоомтой холбоотой хэрэг байгаа гэх мэдээллийн дагуу прокуророос зөвшөөрөл авч мэдээлсэн" гэх тайлбарыг сайд О.Алтангэрэл өгөв.

О.Алтангэрэл: Надад айж, бултаад байгаа зүйл байхгүй

Үүсээд буй "Ноорог"-ийн асуудалд хэн хариуцлага хүлээх талаар УИХ-ын гишүүн Г.Дамдинням "Явж явж хэдэн цагдаа хариуцлага хүлээгээд дуусах вий дээ. Та ХАРИУЦЛАГА ХҮЛЭЭХ ҮҮ" гэж сайд О.Алтангэрэлээс асуухад "Хэрэв улстөрийн буруутгал хэрэгтэй байгаа бол би түүнийг нь хүлээхэд бэлэн. Надад айгаад, асуудлаас бултаад байгаа зүйл байхгүй.

Цагдаагийн алба хаагчдыг цахим мөрийтэй тоглоомтой тэмц гэж хэлчхээд тэмцээд явахаар нь үндэслэлгүйгээр буруутгаад байж болохгүй" гэж хариулсан юм.

Ц.Сандаг-Очир: УИХ-ын гишүүд хууль тогтоох ажилдаа л анхаар

"Ноорог"-ийн асуудлыг УИХ, Засгийн газрын хэмжээнд хэлэлцэж эхэлсэнд УИХ-ын гишүүн Ц.Сандаг-Очир шүүмжлэлтэй хандаж "УИХ-ын гишүүд чинь яачхаад байгаа юм бэ. Өдөрт хэдэн зуун мянган хэрэг гарч байхад нэг хэргийг авч ирээд УИХ, ЗГ-ын түвшинд яриад байх юм уу.

УИХ-ын гишүүд хууль тогтоох үндсэн үйл ажиллагаандаа анхаарлаа хандуул" гэлээ.

П.Сайнзориг: Бүлэглэлийн гар хөл битгий болоорой, О.Алтангэрэл сайд аа

Мэдээлэл сонсох явцад УИХ-ын гишүүн П.Сайнзориг сайд О.Алтангэрэлд хандан "Бүлэглэлийн гар хөл битгий болоорой, О.Алтангэрэл сайд аа. Та Женкотой холбоотой нь үнэн шүү дээ. Бүх л харлуулах муухай зүйлийн чиглэлийг өгч байгаа шүү дээ. Өөрөө ч үүнийгээ хэлдэг. Баавартай юм аа, зарим талаараа" гэж анхааруулав.

Мөн тэрбээр "ЗГ-ын хийн хоолойн асуудал хариуцсан Тусгай үүрэгт элчин сайд З.Энхболд гэх нөхөр 280 мянган хятад оруулж ирэх гэж байна гээд намайг гүтгэж, худал мэдээлэл тарааж байгаа. Би энэ мэдээллийг нь цагдаад өгч, шалгуулъя гэж бодож байна" гэв.

Ч.Лодойсамбуу: Ерөнхий сайдын багийнхан "Ноорог"-ийн бичлэгийг үзэхийг хүссэн

УИХ-ын гишүүн Ч.Лодойсамбуу "Ерөнхий сайдын гэр бүлийн багийнхан "Ноорог.мн сайтын хийсэн нэвтрүүлгийг л үзье" гэсэн. Тэр даалгаврыг нь цагдаагийнхан биелүүлэх гэж оролдсон гэж бодож байгаа.

Гэтэл араас нь нэг гишүүн нь хэрэгт хутгалдсан байж таараад, дансны мэдээлэл зэргээр асуудал үргэлжилсэн" гэх асуудлыг хөндөж байв. Мөн тэрбээр "О.Алтангэрэл сайд л ардчиллыг байхгүй болгож, одоо л баларчихаад байгаа юм шиг ярьцгааж байна. Үгүй шүү дээ.

Энэ бол Л.Оюун-Эрдэнийг Ерөнхий сайд болсон цагаас эхэлсэн. Х.Нямбаатар сайдын үед зүгээр л самбар дээр хэргийн материалыг задалж ярьдаг байдал хэрээс хэтэрсэн.

Б.Энхбаяр сайд дээр ч үргэлжилсэн. Энийг л шийдэх гэж АН Засагт нь ажиллаж байгаа байлгүй дээ" гэв.

Н.Алтанхуяг: Хүнийг залхаан цээрлүүлэх арга хэрэглэсэн байна

УИХ-ын гишүүн Н.Алтанхуяг "Хүнийг залхаан цээрлүүлэх аргыг хэрэглэсэн байна. Залуусыг энд тэндээс бөөгнүүлээд 22.00-07.00 цагийн хооронд байлгана гэдэг бол ЭРҮҮДЭЖ байгаа хэрэг" гээд "Тэр 8 залуу гээд байгаагаас 3-ыг нь шоронд хийчхээд байгаа юм уу, 1-ийг нь хийчхээд байгаа юм уу. Би ойлгохгүй байна" гэж ажлын хэсэгт багтсан ЦЕГ-ын Хуулийн хэлтсийн дарга Б.Батзоригоос тодруулахад "Нийтэд мэдээлэх боломжтой хэмжээнд "3 хүнийг" гэж мэдээлэл ирсэн. Ямар 3 хүн гэдэг тодорхой мэдээлэл алга" гэх тайлбарыг өгөв.

С.Цэнгүүн: Хүмүүс "Ноорог"-ийн залуусыг органикаар дэмжиж, хамгаалж байгаа

Төгсгөлд нь УИХ-ын гишүүн С.Цэнгүүн үүсээд буй асуудлыг дуугүй өнгөрөөж чадахгүйгээ илэрхийлж "Сонгуулийн сурталчилгааны 18 хоногийг баримтжуулаад, бүрэн хэмжээний кино хийх материал цуглуулахын хажуугаар хэн нэгнийг гутаахгүйгээр 4 ДЭХ ЗАСАГЛАЛЫН үйл ажиллагааг маш амжилттай явуулж байсан.

Тиймээс хүмүүс "Ноорог"-ийн залуусыг органикаар дэмжиж, хамгаалж байгаа.

Гэвч "БАРИМТАТ КИНОГОО НИЙТЭД УДАХГҮЙ ЦАЦАХ ГЭЖ БАЙНА" гээд хэлснээс хэдхэн хоногийн дараа баривчилгаа болсон. Үүнийг зүгээр хараад сууж болохгүй" гэх байр суурийг илэрхийлсэн юм.