Монголын эмэгтэйчүүдийн холбоо өнгөрөгч 2024 онд төрөөс 16 сая 800 мянган төгрөгийн санхүүжилт авчээ. Тодруулбал, энэ талаар Монголын эмэгтэйчүүдийн холбооны ерөнхийлөгч Б.Оюунгэрэл NTV телевизийн "Лхагвын тойм" нэвтрүүлэгт оролцох үеэрээ ярьжээ. Тэрбээр "Манай байгууллагыг төрөөс маш их мөнгө авдаг гэж хүмүүс ойлгоод байдаг. Саяхан бид санхүүгийн тайлангаа гаргалаа. 2024 онд бид төрөөс 16 сая 800 мянган төгрөгийг авсан байна. Өөрөөр бид төрөөс нэг төгрөг ч аваагүй. Ингэхдээ бид Гэр бүл, хөдөлмөр, нийгмийн хамгааллын яаманд хоёр төсөл бичиж өгч, түүнийхээ хүрээнд санхүүжилт авсан. Үүнд, эмэгтэйчүүдийн хөдөлмөр эрхлэлтийг дэмжих чиглэлээр Хөдөлмөрийн тухай хуулийг сурталчилах ажлыг таван аймагт хэрэгжүүлэх, өсвөр үеийнхэнд зориулсан "Нандин" төсөл багтсан" гэжээ.