Нийслэлийн Хөрөнгө оруулалтын газрын даргаар ажиллаж байсан С.Цэдэнсодномыг 2024 оны 11 дүгээр сарын 27-н буюу өчигдөр орой АТГ-аас дайчлан баривчилжээ. Тодруулбал, С.Цэдэнсодномыг Сөүл-Улаанбаатар чиглэлийн нислэгээр ирэхэд нь “Чингис хаан” нисэх онгоцны буудалд баривчилсан байна.

Түүнийг иргэд, компаниудаас их хэмжээний хахууль авсан байж болзошгүй бөгөөд урьдчилсан байдлаар хахуулийн хэмжээ 200 орчим сая төгрөгөөр яригдаж байгааг эх сурвалж мэдээллээ.

АТГ-ынхан түүнийг удаан хугацааны турш мөрдөн шалгаж, эх үүсвэр нь тодорхойгүй “Мерседес бенз” машин, өндөр үнэтэй амины орон сууц захиалсан зэргийг нь илрүүлсэн байна. Тэрбээр уг хөрөнгүүдээ хөрөнгө, орлогын мэдүүлэгтээ мэдүүлээгүй байжээ.

С.Цэдэнсодном нь Нийслэлийн Хөрөнгө оруулалтын газарт 2013 оноос хойш газрын орлогч дарга, алба, хэлтсийн даргаар ажиллаж байгаад 2023 оны 12 дугаар сараас тус газрын даргаар томилогдон ажиллаж байгаад чөлөөлөгдсөн аж.