Автобусны дугуйг дур мэдэж тоноглосон жолоочийн цалинг хасаж, дугуйны тоноглолыг авсан байна. Нийтийн тээврийн бодлогын газраас энэ талаар мэдээлэхдээ, 2-131 дугаартай жолооч дур мэдэн автобусны дугуйнд стандарт бус бэхэлгээ хийсэн тул зөрчлийг яаралтай арилгуулан жолоочид сануулах арга хэмжээ авч, шагнал цалинг хасах шийдвэр гаргасан байна.

Цахим орчинд нийтийн тээврийн Yutong автобусны тоноглосон обудны зураг цацагдсан нь шүүмжлэл дагуулсан. Замын хөдөлгөөнд оролцох үедээ хажуу эгнээний машиныхаа дугуйг хагалахаар хадаас шиг энэ дугуйны талаар Нийтийн тээврийн бодлогын газраас тодруулахад "Стандарт биш" гэж тодорхойлов. Энэ талаар ярихдаа " Жолооч өөрийнхөө сонирхлоор ингэж тоноглосон байна билээ. Өнөө өглөө ийм тохиолдол гарлаа" гэх тайлбар өгсөн юм.