УИХ-ын чуулганы өнөөдрийн хуралдаанаар Ерөнхийлөгчийн төсөвт тавьсан хоригийг хэлэлцлээ. Хуралдаанд 89 гишүүн оролцсоноос 70 нь дэмжиж, 78.7 хувийн саналаар Ерөнхийлөгчийн тавьсан хоригийг хүлээн авсан. Хоригийг хүлээж авахаас өмнө УИХ-ын гишүүд өөрсдийн байр сууриа илэрхийлсэн юм.

Энэ үеэр УИХ-ын гишүүн Н.Номтайбаяр "Ард иргэд энэ төрд итгэж байгаа зүйл юу ч байхгүй. Хүлээлт ч ерөөсөө байхгүй. Учиргүй мундаг төсөв оруулж ирлээ, алсын хараатай, хөгжлийг хурдасгах, зоригтонгууд гээд сүртэй юм яриад л байсан. 27-28 сайд давхар дээлтэй. 2-3 халаасны гишүүдтэй, "коноп"-той. Тэгээд л хүч түрээд явчихна" гэв.