Манай улс энэ оны аравдугаар сард нийт 155 улстай гадаад худалдаа хийсэн байна. Нийт экспортын 95.8 хувийг эрдэс бүтээгдэхүүн, үнэт чулуу, металл, гоёлын зүйлс болон нэхмэл бүтээгдэхүүн эзэлж байгааг Үндэсний статистикийн хорооны мэдээлэлд дурджээ. Харин нийт импортын 72.2 хувийг эрдэс бүтээгдэхүүн, машин механик төхөөрөмж, цахилгаан хэрэгсэл тээврийн хэрэгсэл, тэдгээрийн эд анги, үндсэн төмөрлөг эд эзэлж байгаа юм.

Тодруулбал, ОХУ-аас импортолсон барааны 70.8 хувийг нефтийн бүтээгдэхүүн, Япон улсаас импортолсон барааны 77.5 хувийг суудлын автомашин, БНХАУ-аас импортолсон барааны 11.1 хувийг ачааны автомашин тус тус эзэлж байна. Он гарсаар манай улс урд хөршөөс оруулж ирсэн машин, тоног төхөөрөмж 29.5 хувь болж өмнөх оны мөн үеэс 0.4 хувиар өссөн үзүүлэлттэй байна.