Баянзүрх дүүргийн 26 дугаар хорооны нутаг дэвсгэрт байрлах “Дүнжингарав” худалдааны төвийн замд энэ оны нэгдүгээр сард гарсан галын хэргийг шалгах ажлын хэсгийг Улсын ерөнхий прокурорын газраас байгуулсан. Тэгвэл эх сурвалжийн мэдээллээр уг хэрэгт одоогоор яллагдагчаар татагдсан хүн байхгүй гэнэ.

Улсын Онцгой омиссын нарийн бичгийн дарга Т.Баярхүү дөрөвдүгээр сарын 4-нд "Баянзүрх дүүргийн 26 дугаар хорооны нутаг дэвсгэр, Дүнжингаравын уулзварт болсон дэлбэрэлтэд хоёр машины жолоочийн хэн нь буруутай болох, нийт хохирлын хэмжээг тогтоохоор ажиллаж байна. Цагдаагийн байгууллагын ажлын хэсэг мөрдөн шалгах ажиллагааг явуулж байгаа" гэх мэдээллийг өгсөн юм.

Эргэн сануулахад, Дүнжингарав худалдааны төвийн уулзварт өнгөрсөн нэгдүгээр сарын 23-24-нд шилжих шөнө газ тээвэрлэж явсан ачааны автомашин суудлын автомашинтай мөргөлдөн дэлбэрэлт болсон. Тус дэлбэрэлтэд ОБЕГ-ын гурван алба хаагч өртөж нас барсан бол 14 хүн түлэгдэж эмнэлэгт хүргэгдсэн. Үүнээс хойш дөрвөн иргэн шархаа даалгүй нас барсан юм. Мөн орон сууц шатаж олон айл өрх орох оронгүй болоод байгаа.

Улмаар Дүнжингаравын дэлбэрэлтэд өртсөн 207 дугаар байранд үүссэн хагарал нь газар хөдлөлтөд тэсэхгүй гэх дүгнэлт гарсан. Мөн орон сууц болон оршин суугчдын хохирлын үнэлгээнээс бусад гудамж талбай, зам байгууламж, тээврийн хэрэгсэл, сургууль, оффис, аж ахуйн нэгжид 1.8 тэрбум орчим төгрөгийн хохирол учирчээ.