АТГ-аас өнөөдөр олон нийтийн анхаарлын төв байгаа нүүрс болон ногоон автобустай холбоотой хэргүүдийг шалгаж эхэлсэн талаар мэдээлэл хийсэн. Тэгвэл хэвлэлийн хурлаараа АТГ-ын нэгдүгээр хэлтсийн дарга, ахлах комиссор Б.Батбилэг нүүрстэй холбоотой хэрэгт шалгагдаж буй улс төрийн өндөр албан тушаалтнуудын хэргийн талаарх мэдээллийг өгсөн юм.
Энэ үеэрээ УИХ-ын дарга асан З.Энхболдтой холбоотой хэргийн талаар товч мэдээллийг хүргэлээ. Тэрбээр "Нүүрстэй холбоотойгоор шууд болон шууд бус холбоотой АТГ-аас зарласан албан тушаалтнуудаас гадна зарим албан тушаалтнуудыг нүүрсний асуудалд холбогдуулж шалгаж эхэлсэн. Тухайлбал, УИХ-ын дарга асан, УИХ-ын гишүүн байсан хүнд хамаарах хэрэг прокурор дээр хянагдаж байна" гэсэн юм.
Тэгвэл эх сурвалжийн мэдээлж буйгаар, УИХ-ын даргаар ажиллаж байсан З.Энхболдыг нүүрсний хэрэгт холбогдуулан шалгаж яллах дүгнэлт үйлдүүлээд шүүхэд шилжүүлэх саналтайгаар прокурорын байгууллагад АТГ-аас шилжүүлээд байгаа ажээ.
Прокурор уг саналыг хянаж үзээд шүүхэд шилжүүлэх эсэхийг нь эцэслэн шийдвэрлэнэ.
