УИХ-ын дарга Г.Занданшатарын урилгаар ОХУ-ын холбооны хурлын төрийн Думын дарга Вячеслав Викторович Володин Монгол улсад албан ёсны айлчлал хийж буй. Айлчлалын ач холбогдол, үр нөлөө зэргийн талаар "MEC" судалгааны байгууллагын захирал Л.Золбаатараас тодрууллаа.

-УИХ-ын дарга Г.Занданшатарын урилгаар ОХУ-ын Холбооны хурлын Думын дарга В.В.Володин Монгол Улсад айлчилж байна. Айлчлалын ач холбогдлыг та юу гэж харж дүгнэж байна вэ?

-В.В.Володины айлчлалыг тийм ч их онцлоод байх зүйл биш л дээ. Энэ жил л гэхэд Польш, Франц, Гэгээн Ширээт Улсын тэргүүнүүд манай улсад айлчиллаа. Энэ бол Монгол Улсын олон тулгуурт гадаад бодлогын нэг хэсэг. Үүнийг эсэргүүцэх хүн байдаг. Дэмжих хүмүүс ч бий. Энэ утгаараа В.В.Володины айлчлал манай гадаад бодлогын л нэг хэсэг. Тиймээс огцом эсэргүүцээд аль эсвэл онцлоод байх сэдэв биш. Эсэргүүцэх нь хэвийн үзэгдэл. Эсэргүүцэж байсан ч энэ чинь манай хөрш шүү дээ. Дипломат харилцаатай олон жил болж буй. Стратегийн түншлэлтэй.

-Орос, Украины нөхцөл байдал, түлшний экспорт зэрэг асуудлаас шалтгаалан В.В.Володины айлчлалыг эсэргүүцэх хүмүүс байна. Энэ цаг үед бид ямар байр сууринаас хандах ёстой вэ?

-Түлшний тухайд ОХУ энэхүү хоригийг зөвхөн манай улсад хийгээгүй. Экспортдоо хязгаарлалт тавьж байгаа. Манайх түлш, шатахуунаа өөрсдөө үйлдвэрлэдэг болох нь бидний шийдэл. Хурдан л өөрсдөө үйлдвэрлэж, гадагшаа гаргадаг болох хэрэгтэй. Нөгөө талдаа Орос Украины дайн бол тэдний л асуудал. Монгол Улс төвийг сахисан байр сууринаас хандаж байгаа. Тэнд болж буй зүйлийг бид өөрсдөдөө хэт наах хэрэгтэй юу гэдэг л асуудал л байна. Иймэрхүү айлчлал өчнөөн л болдог.