Бид Хятад гэж мэдэх ч Хятад улсын хөгжлийг төдийлөн мэдэхгүй өдийг хүрчээ. "Аль муу хоол хүнс үйлдвэрлэж, хамгийн л чанар муутай материалаар Монголчуудыг хувцасладаг" гэсэн ахархан бодлоор тус улсыг төсөөлөлдөө харж явсан нь нууц биш. Гэвч үнэн хэрэгтэй тийм биш аж. Магад тус улсад зочилж бас аялж үзсэн хүмүүс үүнийг гэрчлэх биз.

Монголын Сэтгүүлчдийн Нэгдсэн Эвлэл Бүх Хятадын Сэтгүүлчдийн холбоотой хамтран БНХАУ-ын таван муж хотоор Монгол-Хятадын сэтгүүлчдийн хамтарсан сурвалжилгыг зохион байгуулсан юм. Тэгвэл хамтарсан сурвалжлагын баг хамт олон Шанхай хотоор хийсэн эхний өдрийн сурвалжилгыг хүргэж байна.

БНХАУ, Шанхай хот

25 сая гаруй оршин суугчтай Шанхай хот нь дэлхийн хамгийн их хүн амтай хотын нэгд тооцогддог. Тиймдээ ч БНХАУ-ын төв Засгийн газарт шууд харьяалагддаг дөрвөн хотын нэг бөгөөд БНХАУ төдийгүй бүс нутаг, олон улсын худалдаа, эдийн засаг, банк санхүү, хөрөнгийн зах зээл, далайн тээврийн төв, Хятадын Засгийн газраас далайн эргийн нээлттэй бүс хэмээн зарласан эх газрын өндөр хөгжилтэй хот юм.

• Сурвалжилгын эхний цэг "MicroPort" компани

Эмч өвчтөн хоёр хол ч "РОБОТ" хагалгаа хийж байна

Хамтарсан сурвалжилгын баг хамт олны хамгийн түрүүнд зочилсон газар бол "Жанжяний Бичил хагалгааны эмнэлгийн тоног төхөөрөмж" үйлдвэрлэх "MicroPort" компани юм.

Тус компани нь зүрх судас, электрофизиологи, зүрхний хэмнэлийн менежментийн систем, яс болон зөөлөн эдийг нөхөн сэргээх технологи, аорт болон орчны хөндийн өвчин, тархи, мэдрэлийн системийн эмгэгийг хамарсан эмчилгээг роботоор дамжуулан хийх боломжийг ч мөн бий болгосон бөгөөд өөр олон өвөрмөц роботыг зохион бүтээх төлөвлөгөөтэй, алсын зайн удирдлагаар өвчтөн эрүүлжүүлэх аппаратуудыг зохион бүтээдгээрээ олон улсад үнэлэгдсэн байна.

Сурвалжилгын явцад тус компанийн үйлдвэрлэсэн бичил робот эмчээс 500 гаруй километрийн зайд байрлах Шэньжэнь хотод Элэгний церозтой өвчтөнд хагалгаа хийж байсан юм. Үүнээс харахад тус төхөөрөмж нь өргөн уудам тал нутагтай манай улсад ихээхэн хэрэгтэй техникийн шийдэл гэдгийг харж болох юм.

• Сурвалжилгын хоёр дахь цэг "Шанхай цамхаг"

Үүлэн дунд орших "АЗИЙН ЦАМХАГ"

Дэлхий дээрх хамгийн өндөр барилгуудын III эрэмбэлэгддэг "Шанхай цамхаг" нь Шанхай хотын Пүдүн дүүргийн Лүжязүй санхүү худалдааны бүсэд байрладаг. Уг барилга нь 632 метр өндөр 127 давхартай бөгөөд оффис, зочид буудал, худалдаа үйлчилгээ зэрэг хэлбэрэрээр ашиглагддаг байна.

Тус цамхгаас Шанхай хотыг бүхэлд нь харах боломжтой бөгөөд яах аргагүй томоохон бүтээн байгуулалт болсон нь илхэн. Учир юун гэвэл 100 давхар руу гарахад 20 гаруйхан секундийг зарцуулдаг нь хамгийн их сонирхол татаж байсан юм. Түүгээр ч зогсохгүй БНХАУ-ын эртний түүх соёлыг давхар бүрийнхээ мөн өрөө болгондоо уран нарийн, өвөрмөц байдлаар шигтгэсэн нь ажиглагдаж байв. Мөн тус барилгад байрлах зочид буудлын хамгийн үнэтэй өрөө нь 28 сая юань гэх мэдээллийг бидэнд өгсөн юм.

• Сурвалжилгын гурав дахь цэг "Шанхай хотын төлөвлөлтийн үзэсгэлэнгийн ордон"

Шанхай хотыг "ХОТЫН ЦОНХ"-оор тольдов

Шанхай хотын хот төлөвлөлтийн үзэсгэлэнгийн ордон нь тус хотын төлөвлөлт, хөгжил, хотын өнгө төрхийг харуулах цонх нь аж. Тийм ч учраас тус үзэсгэлэнгийн ордыг "Хотын цонх" хэмээн нэрийджээ.

Уг ордон нь "Оршил хэсэг" "Хүмүүнлэг хот" "Инновац хот" "Эко хот" гэсэн дөрвөн үзэсгэлэнгийн танхимтай бөгөөд Шанхай хотын үүсэл хөгжил хийгээд өнөөгийн дүр төрхийн түүхийн жимийг модон, шилэн, төмөр зэрэг төрөл бүрийн материалаар хийгдсэн макет загварууд болон техник технологийн өвөрмөц шийдэл, дижитал хэлбэрээр бэлтгэсэн байдаг байна.

• Сурвалжилгын дөрөв дэх цэг "Үличяо гудамж"

Лифт заавал "ДОТОР" байрлах албагүй

Бидний сурвалжилгын дараагийн цэг бол "Үличяо гудамж"-д байрлах Гүнфан хороолол байлаа. Уг гудамж нь Шанхай хотын эртний гудамжуудын нэг бөгөөд ахмад настнууд олон байдаг гэнэ. Гэвч тус гудамжинд байрлах хуучин орон сууцны хороолол болох Гүнфан хороолол лифтгүй учраас 2018 оноос эхлэн иргэдийн санал хүсэлтийг харгалзан лифт суурилуулж эхэлжээ.

Тэдгээр хотхонууд нь манайхаар "Орос барилга"-ууд шиг гэж хэлэхэд болох. Манай хуучны 4-5 давхар орос барилгууд лифтгүйтэй яг адил Гүнфан хороололд ч өмнө нь лифт байдаггүй байж. Тэгвэл тус гудамжнаас сурвалжилга бэлтгэх явцад хамгийн их анхаарал татсан зүйл бол лифт суурилуулсан байдал байв. Учир нь лифт зөвхөн дотор биш барилгын гадна талд ч байх боломжтой аж. Заавал дотор нь лифт хийх гэж зүтгэх бус хорооллын гадна талд лифт суурилуулсан нь маш олзуурхууштай санаа байсан гэхэд буруудахгүй болов уу.

Хог ангилах моодонд суралцахад "ХАНДЛАГА" хамгийн чухал

Түүнчлэн "Үличяо гудамж" хог хаягдлыг ангилах тал дээр онцгойлон анхаарч байгаа аж. Тийм ч учраас "Хог ангилах шинэ моод"-ыг бий болгож, гудамжны хог ангилах сайн дурын үйлчилгээний баг бий болжээ. Тэр ч утгаараа иргэд хогоо ангилан хаяхаас гадна сайн дурын багийнхан дахин ашиглагдаж болох хогийг худалдан авдгаараа онцлогтой байв.

Мөн зарим хорооллуудын оршин суугчид өөрсдийн амьдрах орчин нөхцөлөө сайжруулж, ногоон байгууламжийг ч бий болгожээ. Үүний хажуугаар хогоо ангилан хаях төдийгүй хогоо хаясан бол гар угаах ч боломжийг бүрдүүлэн өгчээ.

Түүнээс гадна хоол хүнсний үлдэгдлийг тусад нь асгах тусгай хэсэгтэй бөгөөд үйлчлэгч шингэн хог хаягдлыг зориулалтын сав руу түлхэн асгадаг байна.

Монгол-Хятадын хамтарсан сурвалжилгын баг хамт олны үзэж сонирхсон эхний өдрийн аялал ийнхүү өндөрлөв. Бичил хагалгааны тоног төхөөрөмж манай улс шиг уудам хөндий нутагт тун хэрэгцээтэй гэж хэлэхэд буруудахгүй болов уу. Учир нь манайд цаг алдах тохиолдол их байдаг тул хөдөө алс нутагт оршин суух иргэд эмнэлгийн тусламж үйлчилгээг яаралтай авч чаддаггүй. Магад удахгүй бидэнд ийм боломж нээгдэж, Монголын шилдэг инженерүүд шинэ содон зүйлсийг бүтээнэ гэдэгт эргэлзэхгүй байна.

Харин өнөөдөр бид дээрх туршлагуудаас амьдралдаа авч хэрэгжүүлэхэд хамгийн их дөхөм зүйл нь мэдээж хог хаягдлаа ангилан хаях явдал байв. Хэдий техник технологийн хөгжлөөр гүйцэхээр тэмүүлж буй ч хэсэг хугацаанд бид өөрсдийн харилцаа хандлагыг сайжруулж хамгийн энгийн хог хаягдлаа зөв ялгаж чаддаг болох нь зүйн хэрэг болов уу.

БНХАУ-аас туршлага судалсан энэхүү томилолтын үргэлжлэл тун удахгүй нийтлэгдэх бөгөөд ЭНД дарж өмнөтгөлтэй танилцах боломжтой.