УИХ-ын чуулганы нэгдсэн хуралдаанаар Үндсэн хуульд оруулах өөрчлөлтийн төсөл болон дагаж мөрдөхөд шилжих журмын тухай хуулийн төслийг хэлэлцэж байна. Энэ үеэр УИХ-ын гишүүн Ц.Даваасүрэн "Хоёр удаа тойрогтоо ажиллахдаа 11 уулзалтыг хийлээ. Дийлэнх нь намын жагсаалт, гишүүдийн тооны өөрчлөлтийг дэмжсэнгүй. Намын жагсаалтад нэр хүнд муутай, сонгогдох боломжгүй хүмүүс гарч ирэх шалтгаан болно гэж тэд үзэж байна. Иргэдийн маань дийлэнх нь ийнхүү үзэж байгаа учраас би ч дэмжих боломжгүй. Би тэдний мандатын эрхийг хэрэгжүүлж буй хүн. Сонгуулиар очих бүртээ та бүхний төлөө ясаа дундартал зүтгэнэ гэж ярьчихаад өнөөдөр тэдний сонгох эрхэд халдаж чадахгүй" гэв.