“Гэмт хүн гэлбэлзэнэ“

Хэзээнээсээ УИХ-ын гишүүний бүрэн эрх гэдэг зарим нэг эрх мэдэлтнүүдийн хувьд булхайгаа нуух нуувч болсоор ирсэн. Тиймээс гэмт хэрэгт холбогдсон гишүүд бүрэн эрхээсээ татгалзахгүй хэмээн тас гүрийдэг уламжлалтай. Өнгөрсөн 30 гаруй жилийн хугацаанд ч гэсэн бүрэн эрхээсээ татгалзаад шалгуулсан гишүүд гарын таван хуруунд багтахаар цөөхөн байна.

Тэгвэл “Нүүрсний” гэх хэрэгт холбогдоод буй УИХ-ын гишүүн Н.Наранбаатар “Намайг хэлмэгдүүлэх нөхцөл бүрдчихсэн байна гэх болгоомжлол төрсөн учраас л бүрэн эрхээсээ татгалзахгүй шалгуулна” хэмээн “Өдрийн сонин”-д ярилцлага өгчээ.

Түүнийг ямар хэргээр шалгаж байгааг манай ubn.mn сайт өнөөдрийн “ЭХ СУРВАЛЖ: “Ажнай” 28.7 тэрбумын ногдол ашиг илүү авч Капитроноороо угаасан, Т.Аюурсайхан 1.6 тэрбумын хөрөнгөө тайлбарлаагүй, Н.Наранбаатар Б.Ганхуягт нөлөөлж хятадуудад давуу байдал олгуулжээ” хэмээх нийтлэлдээ бичсэн болно.

1 хүн ба бичвэр нарын зураг байж магад

УЕП Б.Жаргалсайхан зүгээс ч гэсэн “Нүүрсний” гэх хэрэгт холбогдоод байгаа гишүүдийн бүрэн эрхийг түдгэлзүүлэх зайлшгүй шаардлагатай байна гэдгээ хэлээд буй.

Гэтэл мань хүн “бүрэн эрхээсээ татгалзахгүй, хууль шүүх намайг хэлмэгдүүлэх гэж байна, Өмнөговь аймгийг төлөөлөлгүй болгох гэж байна” хэмээн ард түмний нэр барьж буйг олон нийт “гэмт хүн гэлбэлзэж байна” хэмээн бичиж эхэлжээ. Энэ ч үнэний ортой байж болох. Учир нь Монгол Улсын хууль шүүхийн байгууллага улаан цайм хүнийг хэлмэгдүүлсэн тохиолдол сүүлийн 30 жил лав гараагүй. Хуулийг хамгийн их дээдэлж, ард түмэнд үлгэр дуурайлал болох хүмүүс нь ийнхүү үгүйсгэж байгаа нь хачирхалтай.

Ямартай ч өнөөдрийн Халдашгүй байдлын дэд хорооны хурлаар нүүрсний гэх тодотголтой авлига, албан тушаалын гэмт хэрэгт холбогдоод буй “их гурвал”-ыг бүрэн эрхээс нь түдгэлзүүлэх асуудлыг хэлэлцэж шийдвэрлэх билээ.

Гэхдээ Т.Аюурсайхан нь лоббидож гүйхгүй, “Ажнай” Бат-Эрдэнэ нь "тэрбумдахгүй", Н.Наранбаатар нь “гэлбэлзэхгүй” бүрэн эрхээсээ татгалзаад үнэн мөнөө тогтоолгочихвол хаа хаанаа тус дэмтэй мэт.