Саяхан АТГ-аас нүүрсний хэргээр яллагдагчаар татагдан шалгагдаж байгаа УИХ-ын долоон гишүүнээс Т.Аюурсайхан, Д.Бат-Эрдэнэ, Н.Наранбаатар нарыг гишүүний бүрэн эрхээс нь түдгэлзүүлэх саналыг Прокурорт хүргүүлэх тухайгаа мэдээлсэн билээ.

Харин УИХ-ын хаврын ээлжит чуулган өчигдөр нээхтэй зэрэгцэн Ерөнхий сайд захирамж гарган Т.Аюурсайханыг өөрийнх нь хүсэлтийн дагуу ХНХ-ын сайдын албан тушаалаас чөлөөлөөд буй.

Тэгвэл Т.Аюурсайхан, Д.Бат-Эрдэнэ, Н.Наранбаатар нарыг УИХ-ын гишүүний бүрэн эрхээс түдгэлзүүлэх АТГ-ын гаргасан саналыг Прокурор хүлээн авсан даруйдаа УИХ-ын даргад саналаа өргөн барьж, энэ долоо хоногийн чуулганаар хэлэлцэх ёстой байсан юм.

Гэтэл албаны эх сурвалжийн мэдээлснээр Ерөнхий прокурор Б.Жаргалсайхан гадагшаа томилолтоор явсан тул уг асуудлыг ирэх долоо хоногт багтаан шийдэх бололтой байна.

Үүнээс гадна өөр нэг сонирхол татаж буй зүйл нь УИХ-ын гишүүн Т.Аюурсайхан Засгийн газрын сайдаасаа чөлөөлөгдсөн боловч УИХ-ын гишүүний бүрэн эрхээсээ чөлөөлөгдөх хүсэлтээ УИХ-ын даргад одоо хэр нь хүргүүлээгүй явжээ. Энэ агуулгаар тэрбээр УИХ-ын гишүүний бүрэн эрхээ хэвээр хадгалах сонирхолтой байгаа гэх яриа саарал ордны "тамхины цэг"-ээс сонсогдох болов.