БНСУ-ын Сөүл хотын Итэвонд халлевүүний баяр тэмдэглэх гэж байсан иргэд бөөгнөрөл үүсгэсний улмаар 151 хүн амиа алдсан харамсалтай хэрэг гарсан. Тодруулбал, бөөгнөрлийн улмаас иргэд агааргүйдэж, амьсгал чадаагүйн улмаас нас барсан байдаг.

Үүнтэй холбогдуулан БНСУ-ын Ерөнхийлөгч Үндэсний гашуудал зарласан. Харин манай Монголын зарим уран бүтээлчид БНСУ-д тоглолт хийхээр бэлдээд байгаа юм. Тиймээс БНСУ-д суугаа Монголын Элчин сайдын яамнаас дараах мэдэгдлийг гаргажээ.

Мэдэгдэлд "2022 оны 10 дугаар сарын 29-нөөс 30-нд шилжих шөнө Сөүл хотын Юнсан дүүргийн Итэвон хороонд хэт олон хүн цугларснаас үүдэлтэй ослоос шалтгаалан олон хүний эрдэнэт амь эрсэдсэн эмгэнэлт явдал боллоо.

Суугаа орны төр засаг, ард иргэд, дэлхийн улс орнууд болсон хэрэг явдалд эмгэнэн гашуудаж, сэтгэл зүрхээрээ хамт байгаагаа илэрхийлж байна.

Энэхүү хүнд цаг үед бид солонгос анд нөхөдтэйгээ хамт бөгөөд манай улсын иргэд та бүхэн оршин суугаа орныхоо гашуудалт цаг үеийг хүндэтгэн, аливаа төрлийн баяр ёслол, тоглолт, спорт наадам зохион байгуулахгүй, оролцохгүй байхыг уриалж байна" хэмээжээ.