УИХ-ын Нийгмийн бодлогын байнгын хорооноос “Халамжаас-Хөдөлмөрт” хэлэлцүүлгийг өчигдөр Төрийн ордонд зохион байгуулсан.

Тэгвэл уг хэлэлцүүлэгийн үеэр ХНХ-ын сайд Д.Сарангэрэл "Нэн ядуу өрхүүдийг зорилтот бүлэг гэж хэлбэл мэдэхгүй, манай яамныхан "Улны айл" гэж нэрлэдэг. Эдгээр өрхийг ядуурлаас гаргахын тулд үсчний сургалтад хамруулна" хэмээсэн нь олон нийтийн дургүйцлийг ихээхэн хүргэсэн бөгөөд өнөөдөр сайд хэлсэн үгэндээ тайлбар өглөө.

Тэрбээр, "Улны айлууд гэж болгоомжгүй үг хэллэг ашигласандаа юуны өмнө хүлцэл өчиж байна. Олон улсад "УЛНЫ АЙЛ"-уудыг Bottom хэмээн нэрлэдэг. Үүнийг нь манай мэргэжлийн хүн надад орчуулж, ойлгуулж өгсөн. Өчигдрийн хэлсэн үгэн дээр акцент өгч байна лээ.

Миний хувьд олон хүүхэдтэй айлын охин. Хэн нэгнийг амьдралынх нь түвшнөөр ялгаварлан гадуурхах санаа байхгүй. Хоёр жил бид халамжаас хөдөлмөрт гэж ярьсан. Одооноос ажлаа эхэлье. Түүнээс биш хэн нэгнийг эд хөрөнгөөр нь ялгаварлах санаа бодол огт байхгүй.

Тэр үгийг мэргэжлийн хүмүүс ингэж хэрэглэдэг юм аа гэсэн санааг л би хэлсэн. Олон улсын жишгээр хэрхэн хэрэглэдэг, орчуулгын үг хэрэглэсэндээ миний алдаа болсон байна лээ. Цаашид үгийн сонголт дээр анхаарах ёстойгоо ойлгож байгаа" гэлээ.