Засгийн газрын ээлжит хуралдаан болж өндөрлөлөө. Хуралдаанаас гарсан шийдвэрийг холбогдох албаныхан танилцуулж байна. Энэ үеэр Сангийн сайд Б.Жавхлан НӨАТ-ын сугалааны талаар мэдээлэл өглөө.

Тэрбээр "НӨАТ-ын сугалааг түр хугацаагаар зогсоосон. Сугалааны өөрийнх нь технологи, процессийг бид шинэчлэх шаардлагатай болж буй юм. Сугалаа гарснаас хойш долоон жил огт шинэчлэгдээгүй хэвээр явсан. Өмнө бүх хэвлэгдсэн НӨАТ-ын баримтуудыг сугалаанд оруулдаг байсан. Ингэхээр бүртгэгдээгүй баримт ч сугалаанд оролцдог байсан гэсэн үг. Одоо зөвхөн бүртгэлд орсон, бүртгүүлсэн баримтыг НӨАТ-ын сугалаанд оролцуулна. Хамгийн гол нь ил тод болгоно. НӨАТ-ын баримтаа бүртгүүлсэн бол миний хэдэн баримт сугалаанд оролцож байна гэдгийг хянах боломжтой болгоно. Хожих магадлалаа ч сугалааны үеэр харах боломжтой болно. Энэ мэт дэвшилтэт байдлаар НӨАТ-ын сугалааг шударга, олон нийтэд хүлээн зөвшөөрөгдсөн хэлбэрээр явуулдаг болгохоор судалгаа хийж, бэлтгэл ажлаа хангаж байна.

НӨАТ-ын сугалааг есдүгээр сараас сэргээх төлөвлөгөөтэй байгаа. Дөрөвдүгээр сард НӨАТ-ын сугалааг зогсоосноор баримтаа уншуулах тоо 50 хувиар буурсан. Үүнээс харахад, сугалаа НӨАТ-ын орлогод том хөшүүрэг болдог байсан байна. НӨАТ-ын буцаан олголтын хувийг нэмэхгүй. Сугалаа нь өөрөө буцаалтын нэг хэлбэр" гэв.