УИХ-ын нэгдсэн чуулган үргэлжилж байна. Хуралдаанаар Монгол Улсын 2021-2025 оны Хөрөнгө оруулалтын хөтөлбөрийг шинэчлэн батлах тухай тогтоолын төслийг хэлэлцэж байна. Хуулийн төслийг хэлэлцэх үеэр УИХ-ын гишүүд асуулт асууж, хариулт авлаа.

Энэ үеэр УИХ-ын гишүүн Т.Доржханд "Эдийн засаг агшиж байгаа энэ үед БНХАУ-руу экспорт хийх асуудал хэзээ шийдэгдэх юм бэ. Монгол Улсын эдийн засаг дахин сэхээний орон дээр хэвтэх гээд байна шүү" гэв.

Сангийн сайд Б.Жавхлан "Экспорт зогсоогүй, бага хэмжээгээр л гарч байгаа. Гол түүхий эдийн үнэ өндөр, боломжтой байх үед хангалттай хэмжээнд гаргаж чадахгүй байгаа нь л асуудал. Нүүрсний экспортын боомтууд гурван сар гарсаар буюу Ерөнхий сайдын түвшинд хэлэлцээ хийснээс хойш багагүй хэмжээгээр нэмэгдэж байгаа. Өчигдрийн байдлаар 545 чиргүүлтэй автомашинаар нүүрс гарсан" гэлээ.