Улсын их баяр наадмыг цахим хэлбэрээр зохион байгуулах шийдвэрийг Засгийн газар гаргасан. Үүнтэй холбогдуулан зарим аймгийн засаг дарга, онцгой комисс, иргэдийн төлөөлөгчдийн хурлаас энэ жил наадам тэмдэглэхгүй өнжих шийдвэрийг гаргаж, төсөв мөнгөө эрүүл мэндийн салбарт зарцуулахаар болсноо зарлаж байна.
Дээрх шийдвэрийг Өвөрхангай, Дархан-Уул, Дорнод, Сүхбаатар, Орхон, Баянхонгор зэрэг аймгууд гаргаад байгаа бөгөөд Хэнтий аймаг нэмэгдэж наадмын төсвөө Зүрх мартахгүй төсөлд зориулах болсноо мэдээллээ. Тухайлбал аймгийн онцгой комиссоос "Хэнтий аймаг наадам зохион байгуулахгүй. Наадмын зардлыг Зүрх мартахгүй төслийн хүрээнд яаралтай хагалгаанд орж байгаа 10 гаруй хүүхдийн эмчилгээний зардалд зориулна" гэжээ.