ОХУ-д бүтээсэн вакцины 10 мянган хүн тунг манай улс хүлээн авлаа

ОХУ-аас нийт 200 гаруй мянган тун вакцин авахаар төлөвлөж байгаа бөгөөд дараагийн ээлжийн тунг ирэх сарын эхний долоо хоногт хүлээж авах юм.

ОХУ-д бүтээсэн коронавирусний эсрэг Спутник-V вакцины 10 мянган хүн тунг өнөөдөр манай улс хүлээн авлаа.

Тус вакциныг Сөүл-Улаанбаатар чиглэлийн тусгай үүргийн нислэгээр тээвэрлэн авчирсан бөгөөд манай улсын хүлээн авч буй гурав дахь төрлийн вакцин болж байна.

Өмнө нь буюу энэ сарын 22-ны өдөр БНЭУ-д үйлдвэрлэсэн 150 мянган хүн тун Astrazeneca вакциныг хүлээн авсан бол 23-ны өдөр БНХАУ-д үйлдвэрлэсэн 300 мянган хүн тун Синофарм вакциныг хүлээж авсан билээ.

"СпутникV” вакцинаар дэлхийн 40 гаруй улс орон иргэдээ вакцинжуулахаар бүртгэн авч төлөвлөсөн бөгөөд тус вакцины дархлаа тогтоох чанар нь 92 хувийн үр дүнтэй байгааг судалгаагаар тогтоосон байна.

Ингээд нийт 460 мянган хүн тун коронавирусийн эсрэг вакциныг хүлээн аваад байгаа ч одоогийн байдлаар зөвхөн Astrazeneca вакциныг дархлаажуулалтад хэрэглэж байгаа. Синофарм, Спутник-V вакциныг ДЭМБ бүртгэж аваагүй байгаа хэдий ч манай улсын хувьд дархлаажуулалтад ашиглахад хууль эрх зүйн хувьд ямар нэгэн зөрчил байхгүй ЭМЯ-наас мэдээлсэн. Гэсэн ч эдгээр вакциныг дархлаажуулалтад ашиглаж эхлэх эсэх талаар албан ёсны мэдээллийг өгөөгүй байна.