Эрдэнэт хот үүсэн байгуулагдсаны түүхт 50 жилийн ойн баяр наадам ирэх сарын 23-25-ны өдрүүдэд болно. Баяр наадмын үеэр ажиллахаар 150 сайн дурын ажилтан бүртгүүлжээ.

Сайн дурын ажилтнууд баяр наадмын үеэр дотоод, гадаадын иргэд, зочид төлөөлөгчдөд зөвлөгөө, мэдээлэл хүргэх, хүүхэд хамгаалал, эх, хүүхдэд дэмжлэг үзүүлэх зэрэг үйлчилгээ үзүүлэхийн зэрэгцээ баяр наадмын зохион байгуулалтын үйл ажиллагаанд дэмжлэг үзүүлэн ажиллах юм.

Энэ хүрээнд Орхон аймгийн Засаг даргын Тамгын газар, Соёл, урлаг, аялал жуулчлал, залуучуудын газар болон Монголын сайн дурынхны төв хамтран "Сайн дурын үйл ажиллагааны зохион байгуулалт, аюулгүй ажиллагаа" сэдэвт сургалтыг зохион байгуулжээ.

Сургалтын үеэр сайн дурын ажилтнуудад баяр наадмын үеэр гүйцэтгэх чиг үүрэг, хариуцлага, ажлын зохион байгуулалт, аюулгүй ажиллагааны зааварчилгаа, болзошгүй нөхцөл байдалд зөв ажиллах арга барил, хамтын ажиллагаа, харилцааны талаарх зөвлөмж, мэдээллийг өгсөн байна.

Сайн дурын ажилд оролцсоноор залуус нийгмийн хариуцлага, хамтын ажиллагаа, манлайлах ур чадвараа хөгжүүлэхийн зэрэгцээ бусдад туслах, олон нийтийн арга хэмжээнд зохион байгуулалттай ажиллах үнэ цэнтэй туршлага хуримтлуулах боломжтой юм.

Мөн энэ үеэр Орхон аймгийн Улаан загалмайн хорооноос сайн дурын ажилтнуудад ашиглах зориулалттай яаралтай тусламжийн болон эрэгтэй, эмэгтэй, хүүхдэд зориулсан нийт 50 багц цүнхийг хүлээлгэн өгчээ. Эдгээр багцыг баяр наадмын өдрүүдэд 50 цэгт байршуулж, шаардлагатай үед ашиглах юм.