Нийтийн эзэмшлийн гудамж, талбайд зөвшөөрөлгүй байрлуулсан ТҮЦ-үүдийг нүүлгэн шилжүүлсэн байдаг. Гэвч тэдгээр ТҮЦ эрхлэгчид дахин ТҮЦ-ээ байрлуулж эхэлсэн тул өчигдөр нийслэлийн хэмжээнд ачиж, зөөж шилжүүлэх ажиллагаа явагдсан.
Уг үйл явдалтай холбогдуулан Нийслэлийн Засаг дарга бөгөөд Улаанбаатар хотын захирагч Х.Нямбаатар "Нийтийн эзэмшлийн талбай дээр ямар ч зөвшөөрөлгүй бетон цутгаж, дээр нь ТҮЦ байрлуулсан байна.
Хотын төвд бетон цутгаад, дээр нь ТҮЦ байрлуулчхаад, дараа нь үл хөдлөхийн гэрчилгээ хөөцөлддөг ийм зүйл байж болохгүй.
ТҮЦ-ийг хууль бусаар байрлуулсан иргэд тогтоосон хугацааны дотор өөрсдөө зайлуулах ёстой. Тогтоосон хугацаа дуусмагц хотын зардлаар зайлуулж, гарсан зардлыг тухайн ТҮЦ эзэмшигч, зөвшөөрөл өгсөн албан тушаалтнаар төлүүлнэ” гэв.
