ОБЕГ-ын мэдээлснээр өнөөдрийн /2025.06.27/ байдлаар дараах байршлуудад ой хээрийн түймэртэй байна.
Гал түймэр:
Увс аймаг, Цагаанхайрхан сум 4 дүгээр баг /аймгийн төвөөс баруун урд зүгт 240 км Баруунтуруун сумаас баруун зүгт 40 км/ байшин шатаж байна гэсэн дуудлагыг 06.26-ны өдрийн 17:06 цагт хүлээн авсан. Тус аймгийн Онцгой байдлын газрын 60 дугаар ангийн алба хаагчдыг очиход иргэн Ц-ийн 15х40 метрийн хэмжээтэй модны үйлдвэрийн байр бүрэн шатаж байсныг ажиллаж тархалтыг зогсоосон.
Ховд аймаг, Жаргалант сум Бичигт баг хураалттай аргал шатаж байна гэсэн дуудлагыг 06.26-ны өдрийн 16:46 цагт хүлээн авсан. Тус аймгийн Онцгой байдлын газрын 48 дугаар ангийн алба хаагчдыг очиход иргэн Ж-ын 30 ширхэг шуудайтай аргал шатаж байсныг ажиллаж унтраасан.
Ой, хээрийн түймэр:
Төв аймаг, Эрдэнэ сум Баянтуул багийн “Тэргийн гол” /Хэргийн-Оорц/ гэдэг газар /аймгийн төвөөс хойд зүгт 212 км, сумын төвөөс баруун хойд зүгт 150 км, Батсүмбэр сумын төвөөс зүүн хойд зүгт 70 км/ “www.firms.modaps.eosdis.nasa.gov” болон “www.icc.mn” сайтад ойн гал түймрийн цэг илэрсэн мэдээллийг ОБЕГ-ын Гал түймэртэй тэмцэх газраас 06.19-ний өдрийн 19:10 цагт хүлээн авсан. 06.26-ны өдөр тус аймгийн Онцгой байдлын газрын дарга, хурандаа Г.Эрдэнэбатаар ахлуулсан алба хаагчид,, Хан Хэнтий Улсын тусгай хамгаалалттай газрын ажилтнууд ажиллаж, 11:45 цагт бүрэн унтраасан. Урьдчилсан байдлаар түймэрт 285 га талбай өртсөн.
Хөвсгөл аймаг, Цагааннуур сум 2 дугаар багийн “Урд Агяа тайга” гэдэг газар /аймгийн төвөөс баруун хойд зүгт 337 км, сумын төвөөс баруун хойд зүгт 57 км/ “www.firms.modaps.eosdis.nasa.gov” сайтад ойн гал түймрийн цэг илэрсэн мэдээллийг ОБЕГ-ын Гал түймэртэй тэмцэх газраас 06.22-ны өдрийн 12:00 цагт хүлээн авсан. Тус аймгийн Онцгой байдлын газар, Үндэсний аврах бригадын алба хаагчид, тус сумын Засаг даргын Тамгын газрын ажилтнуу нийт 38 хүн ойн түймрийг унтраахаар ажиллаж, 06.26-ны өдрийн 17:00 цагт цурманд оруулж, бүрэн унтраахаар ажиллаж байна.
Дорнод аймаг, Баян-Уул сум Өвөр-Эрээн багийн “Тарам” гэдэг газар /аймгийн төвөөс хойд зүгт 260 км, сумын төвөөс хойд зүгт 60 км/ Ой, хээрийн гал түймэр гарсан тухай дуудлагыг 06.26-ны өдрийн 09:40 цагт хүлээн авсан. Тус аймгийн Онцгой байдлын газрын Баян-Уул сум дахь Гал түймэр унтраах, аврах 53 дугаар анги, Аврах ангийн анги, Хилийн цэргийн 0275 дугаар анги, Баян-Уул сумын Мэргэжлийн анги, Баяндун сумын Мэргэжлийн ангийнхан нийт 50 хүн, 5 автомашинтайгаар ажиллаж, 06.27-ны өдрийн 04:00 цагт ой, хээрийн гал түймрийг цурамд оруулж, 07:05 цагт бүрэн унтраасан. Урьдчилсан байдлаар түймрийн урт нь 3 км, өргөн нь 1.2 км байна.
