Дундговь аймгийн Засаг дарга С.Мөнхчулуун МҮОНРТ-ийн Ерөнхий захирал Г.Гэрэлийн тайлбарт хариу тайлбар хийжээ. Тэрбээр, "9 саяын төлбөр төлөөд дарга нар үг хэлж алдартан гавьяатнууд уухайлаад дуусдаг нэвтрүүлэгт орохгүй гэж шийдсэн. Үнэгүй нэвтрүүлэгт хамтдаа орсон. Ц.Мөнхбат, Р.Эрдэнэбүрэн гишүүдтэйгээ хамт улсын аварга малчдын шагнал гардуулсан. Бид тэгж улс төржихгүй ээ. Нам өөр байсан ч нутаг орны хөгжил гэдэг цэг дээр нэгдээд, хамтраад явна. ТВ9 телевизийн нэвтрүүлэгт хамт оръё гэж 2 гишүүнээ урьсан. Р.Эрдэнэбүрэн гишүүн хөдөө явсан тул амжаагүй, Ц.Мөнхбат гишүүн ирж оролцож нутгийнхандаа мэндчилгээ дэвшүүлсэн" гэх тайлбарыг цахим хуудсаараа дамжуулан хийсэн байна.

ЭРГЭН САНУУЛАХАД, Дундговь аймгийн Засаг дарга С.Мөнхчулуун МҮОНРТ-ийн "Монгол Түмний мэнд" нэвтрүүлэгт оролцоогүй шалтгаанаа "Хэт өндөр төлбөртэй буюу нийт зардал нь нэг аймгаас 15 сая орчим төгрөг гарахаар байсан учраас оролцож чадаагүй" хэмээн тайлбарласан.

Харин МҮОНРТ-ийн Ерөнхий захирал Г.Гэрэл энэ асуудлаар манай сайтад тодруулга өгөхдөө,

"Дундговь аймгийн Засаг дарга С.Мөнхчулуун аймгаасаа сонгогдсон АН-ын гишүүнтэй зэрэгцэж суухыг хүсээгүй учраас нутгийнхныгаа нэвтрүүлэгт оролцуулаагүй гэж ойлгосон. "Монгол түмний мэнд" нэвтрүүлэгт нийт 16 аймаг ирж оролцсон. Аймаг бүрд зориулж шинэ тайз засаж, тухайн аймгийн онцлогийг шингээсэн өнгө, дүрс, график бэлтгэдэг учраас том баг, өргөн бүрэлдэхүүнээр ажилладаг. Түүнээс гадна тухайн аймгийн дуучид, уран бүтээлчид, хөтлөгч, аймаг бүрд зориулсан идээ таваг бэлтгэж, ширээ засахаас эхлээд зардал их гардаг учраас тодорхой зардлыг нь аймгууд өөрсдөө шийдэж өгөөч гэх хүсэлтийг тавьж, нэг аймгаас 8 сая төгрөг гаргасан. Дундговь аймаг энэ жил оролцоогүй. Гишүүн нь Ардчилсан намынх, Аймгийн засаг дарга нь МАН-ынх. Хоорондоо таарамж муутай, нэвтрүүлэгт зэрэгцэж суухыг хүсээгүй учраас аймгийн засаг дарга нь шийдвэр гаргаж нутгийнхныгаа нэвтрүүлэгт оролцуулаагүй гэж ойлгосон. Энэ шийдвэрт нь эгдүүцсэн нутгийнхан нь засаг даргаасаа асуухаар МҮОНРТ төлбөр авдаг учраас гэж тайлбарлаад байгаа юм билээ.

МҮОНРТ аймаг орон нутгаас үнэ төлбөргүй нэвтрүүлгүүдийг тогтмол бэлтгэдэг. Дундговь аймгаас л гэхэд Хөгжим драмын театрын уран бүтээлчдийг нь бүрэн бүрэлдэхүүнээр нь оролцуулсан "Сувдан өргөө" гээд 60 минутын нэвтрүүлгийг үнэ төлбөргүй бэлтгэсэн. Алтан төлийн эзэн болсон уяачийн гэрт очиж нэвтрүүлэг бэлтгэсэн. Нэг ч төгрөгийн төлбөр авдаггүй. Харин жилдээ ганцхан удаа болдог сар шинийн баярт зориулсан "Монгол түмний мэнд" нэвтрүүлгийн тухайд тус нэвтрүүлгийг бэлтгэхэд зардал их гардаг учраас тодорхой хувийг нь аймаг орон нутгаасаа гаргаач ээ л гэсэн юм. Энэ жил анх удаагаа "Монгол түмний мэнд" гэж нэвтрүүлэг хийгээд анх удаа төлбөр аваад байгаа юм биш. МҮОНРТ-ийн цагаан сарын баярт зориулсан брэнд нэвтрүүлэг тодорхой шалтгааны улмаас сүүлийн 3 жил түр зогссон байсныг би энэ жилээс сэргээсэн юм. Өмнө хийгддэг байхдаа ч тухайн үеийнхээ ханшаар тодорхой хэмжээний төлбөр аваад аймгуудаа оролцуулдаг байсан" хэмээн онцолсон юм.