"Моннис групп" нийслэлийн бүх зогсоолыг авч олон иргэд, ААН-үүдийг хохироож байгаа талаар мэдээлэл хийж байна. Дээрх иргэд 5-6 жил төлбөртэй зогсоол ажиллуулжээ.

Иргэдийн төлөөлөл "Бид гэрээгээ зөрчиж байгаагүй, татвараа төлөөд хууль ёсны дагуу үйл ажиллагаа явуулж байсан ч 2024 оны арванхоёрдугаар сарын 31-нд гэрээгээ цуцлах мэдэгдэл ирсэн. Улмаар газраа чөлөөлөхийг шаардсан. Нэгдүгээр сарын 14-20-ны хооронд газраа чөлөөлөх албан шаардлагыг ирүүлсэн. "Улаанбааатар хотын түгжрэлийг бууруулахаар 50 зогсоолыг жишиг зогсоол болгоно. Үүнийг хэрэгжүүлэхийн тулд бидний гэрээг цуцална" гэж тайлбарласан. Нийслэлийн сонгон шалгаруулалтаар “Грийн сити” ХХК-д 100 хувь буюу давуу эрхтэйгээр олгосон.

Арванхоёрдугаар сарын 31-нд сонгон шалгаруулалт явуулсныг мэдээгүй. Хэрэв мэдсэн бол бид оролцох байсан. Хууль тэгш үйлчлээгүй. "Моннис групп"-ийн охин компани болох “Грийн сити ” ХХК давуу байдал олгосон. Том хувийн хэвшилтэй төрд хамтарч, бид нар шиг жижиг зогсоол эрхлэгч нартай төр хамтарч ажилладаггүй юм байна. Өчигдрөөс эхлээд цагдаагийн албатай ирээд хувийн өмчид халдаж зогсоолын тоног төхөөрөмжийг зөөсөн. “Моннис групп"-д төр үйлчлээд байгаа юм уу. Бид авто зогсоолуудыг ажиллуулахдаа ямар ч хууль, дүрэм зөрчөөгүй.

Сонгон шалгаруулалтад тэгш эрхтэй оролцох бидний эрхийг хясан боогдууллаа. Хөдөлмөрчөөр ажиллаж байгаа жижиг ААН-ийг ашигтай юм байна гэж хараад том компани нь дайрдаг. Энэ хандлагыг болимоор байна.