УИХ-ын 2025.01.16-ны өдрийн чуулганы нэгдсэн хуралдаанаар СЗХ-ны орон тооны бус гишүүдэд нэр дэвшигчдийн томилгоог хэлэлцэж байна. Энэ үеэр УИХ-ын гишүүн Х.Ганхуяг нэр дэвшигч Л.Сонороос асуулт асуув. Учир нь нэр дэвшигч Л.Сонор нь Шадар сайд Т.Доржхандын хамаатан. Тиймээс ашиг сонирхлын зөрчилтэй гэх мэдээлэл гараад буй.

УИХ-ын гишүүн Х.Ганхуяг "СЗХ-ны орон тооны бус гишүүнд нэр дэвшигч Л.Сонор таныг төрийн өндөр албан тушаалтан, хувьдаа ББСБ, даатгалтай гэх хүнтэй хамаатан гэх юм. Үнэн үү" гэв.

Нэр дэвшигч Л.Сонор "Үнэн. Т.Доржханд бол миний авга ах. Гэхдээ намайг энэ албан тушаалд нэр дэвшүүлэхэд нөлөөлөөгүй" гэлээ.

Мөн УИХ-ын дарга Д.Амарбаясгалан "Төрд олон жил ажиллаж байгаа туршлагатай залуучуудаа төр чиг үүргийнх нь дагуу томилдог. Энэ залуусаа бохир улстөртэй хутгаж, явцуу улстөр хийх шаардлага байхгүй" гэв.

Сануулахад, Нэр дэвшигч Л.Сонор нь 1990 онд Улаанбаатар хотод төрсөн, 35 настай. 2008-2010 онд АНУ-ын Такома коммюнити коллежийд бизнесийн удирдлагын бакалавр; 2011-2014 онд АНУ-ын Вашингтоны их сургуулийг санхүү, бизнесийн удирдлагаар; 2021-2022 онд БНХАУ-ын Цинхуа их сургуульд төрийн удирдлагын магистрын зэрэг хамгаалжээ.

Тэрбээр 2015-2016 онд Сангийн яамны Санхүүгийн бодлогын газрын Өрийн удирдлагын хэлтсийн зөвлөх (Дэлхийн банк); 2017.01.-2017.09 Сангийн яамны Санхүүгийн бодлогын газрын Өрийн удирдлагын хэлтсийн гэрээт ажилтан; 2017.09-2018.04 Сангийн яамны Санхүүгийн бодлогын газрын Өрийн удирдлагын хэлтсийн мэргэжилтэн; 2018 оноос хойш Сангийн яамны Санхүүгийн бодлогын газрын Санхүүгийн зах зээл, даатгалын хэлтсийн даргаар ажиллаж байгаа юм байна.