Монголчууд бидний уламжлалт цагаан сарын баярын өдөр буюу XVII жарны Модон могой жилийн шинийн 2-ны өдөр ирэх гуравдугаар сарын 1-нд тохионо. Үүнтэй холбоотойгоор "Шинийн нэгэн хоёрдугаар сарын 29-нд тохионо", "Шинийн 1 тасарсан, тасраагүй" гэх мэдээллүүд цахим орчинд цацагдаж, зарим иргэд үнэн, худал мэдээлэл дунд төөрөлдсөн байдалтай өдрүүд өнгөрч байна.

Энэ талаар "Түвдэнпэлжээлин” хийдийн Хамба лам Ж.Гончигсүрэнгээс тодруулахад,

"Энэ жилийн цагаан сарын баярын битүүний өдөр ирэх хоёрдугаар сарын 28-нд, гуравдугаар сарын 1-нд шинийн 2-ны өдөр тохионо. Энэ жил шинийн нэгэн тасарна гэсэн үг. Өдөр тасарсан гээд өөрчлөгдөх зүйл байхгүй. Зурхайн ухаанд өдөр давхцах, тасрах тохиолдол гардаг. Зурхайд өдөр тасарвал өмнөх өдрийг нь, өдөр давхацвал арын өдрийг ашиглана гэж тайлбарласан байдаг юм.

Энэ нь од эрхэсийн хөдөлгөөний үйлчлэл түргэн, удаан байдгаас шалтгаалдаг гэж ойлгоход болно.

Бид хоёрдугаар сарын 28-нд битүүлж, гуравдугаар сарын 1-нд шинийн хоёрондоо золгоно" гэлээ.