Сүүлийн жилүүдэд газар хөдлөлтийн давтамж нэмэгдэх болсон. Энэ талаар ООГХ-ийн Газар хөдлөл судлалын үндэсний мэдээллийн төвийн эрхлэгч, доктор А.Мөнхсайхан "Монгол Улсад 2024 он гарсаар 3.5 магнитудаас дээш хүчтэй газар хөдлөлтийн 40 орчим тохиолдол бүртгэгдсэн. Гэхдээ энэ бүх газар хөдлөлтийн чичирхийллийг хүмүүс мэдрээгүй. Газар хөдлөлт хаана болж байна вэ гэдэг их чухал. Сууршлын бүсэд ойр болох тусам хүмүүс чичирхийллийг илүү мэдэрдэг. Монгол орон өөрөө Төв Азийн газар хөдлөлтийн идэвхтэй бүсэд орж явдаг. Тиймээс иргэд амьдарч буй орчныхоо аюулгүй байдлыг хангах хэрэгтэй " гэв.