ХӨСҮТ-д Нийслэлийн ЭМГ ба ХӨСҮТ-өөс Томуу ба Томуу төст өвчний нөхцөл байдал ба урьдчилан сэргийлэх чиглэлд мэдээлэл өглөө. Энэ үеэр ХӨСҮТ-ийн Томуугийн Үндэсний нэгжийн эмч Ч.Уртнасан, "Амьсгалын замын халдвар ихсэх үед хүүхдүүддээ халуун бүлээн шингэн сайн уулгах хэрэгтэй. Ингэснээр таны хүүхдийн өвдөх эрсдэл хоёр дахин БАГАСНА. Хамгийн гол нь гэртээ бэлтгэсэн шингэн зүйлийг тогтмол уулгах хэрэгтэй. Лаазалсан шингэн, чихэрлэг ундаанаас татгалзах ёстой. Халуурч байгаа хүүхэд хоол ундандаа муудаж, уйлагнана. Тэгэхээр хүүхдэдээ бага багаар шингэн өгч, ердийн хэмжээгээр нь хоол өгөх хэрэгтэй. Ингэхдээ хуурсан, амтлагчтай хоол хүнснээс илүү халуун бүлээн шөлөөр хооллох нь зүйтэй. Мөн хүүхдээ 21.00-22.00 цагийн хооронд тогтмол цагт унтуулах нь чухал" гэлээ.
