Баянзүрх дүүргийн 24 дүгээр хороо, Эрдэнэтолгой орчимд таван байршилд хөрсний ус гарч, Эрдэнэтолгойн гудамжны уулзвараас Газарчин дээд сургууль хүртэлх авто зам дагуу ус тогтож, эвдрэл үүссэн.
Улмаар нийслэлийн Засаг даргын нөөц хөрөнгөөр ус зайлуулах шугам хоолойг хийх, усны урсцыг зогсоох ажлыг ГУББГ-аас эхлүүлсэн. Тэгвэл өнөөдөр ГУББГ-аас 188 метр урт борооны ус зайлуулах шугам, 17 байршилд ус хүлээж авах шүүрт худаг угсарч дууслаа. Ингэснээр Цайз захын уулзвараас Эрдэнэтолгойн уулзвар хүртэлх 1.7 км автозамын засвар шинэчлэлтийн ажлыг эхлүүлэх боломж бүрдээд байна. Уг замын засвар шинэчлэлтийн ажлын тендерийг наймдугаар сарын 15-ны өдөр зарласан бөгөөд энэ сарын 30-ны өдөр нээнэ.
Замын засвар шинэчлэлтийн хүрээнд инженерийн шугам сүлжээний худгийн тагийг асфальтбетон хучилтын түвшинд тааруулах, тэмдэг тэмдэглэгээ, авто замын зорчих хэсгийн асфальтбетон хучилтын ажил хийгдэх юм.
ГУББГ-ын Ерөнхий инженер С.Батсайхан “Уг байршилд гарсан хөрсний усыг Баганат хорооллын баруун талаар зүүн уулын сувагтай нийлүүлж, “Сүнжин гранд” зочид буудал орчмоор гаргаж, Туул гол руу нийлүүлсэн. Ингэснээр Шархадны авто замын ус их тогтдог хонхор 3 хэсэгт ус зайлуулах шугам хийгээд байна. Цаашид өөр байршилд хөрсний ус ундрахгүй бол борооны уснаас шалтгаал авто замд ус тогтохгүй” гэлээ.
Сэтгэгдэл (1)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!