Цагдаагийн байгууллагаас “Ачит ихт” ХХК-тай холбоотой хэргийн мөрдөн шалгах ажиллагааны явцын талаар Прокурорын байгууллагын зөвшөөрсөн хэмжээнд мэдээлэл өгсөн. Энэ үеэр ЦЕГ-ын Хэвлэл мэдээлэл Олон нийттэй харилцах хэлтсийн дарга, дэд хурандаа Г.Пүрэвдэлгэр "Монгол Улсын Ерөнхийлөгч асан Ц.Элбэгдорж нь 2019 оны есдүгээр сарын 10-ны өдөр долларын хугацаатай хадгаламж болон цахим банкны үйлчилгээ авах гэрээ байгуулсан байдаг. Хугацаатай хадгаламжийн бүртгэлд тэрбээр дээрх гэрээнүүдийг байгуулахдаа "Ачит ихт" компанийн хувьцаа эзэмшигч байсан гэж бүртгүүлсэн байна. Мөн тухайн өдрөө гарын үсэг зурсан" гэх мэдээллийг өгсөн.

Тэгвэл уг мэдээлэлд Монгол Улсын Ерөнхийлөгч асан Ц.Элбэгдорж хариу тайлбар өгч, Хаан банкны харилцааны менежер шар мэдээ, вэб сайтын мэдээллийг үндэслэн түүнийг "Ачит Ихт" ХХК-ийн хувьцаа эзэмшигч гэж албан бус мэдээллийг харилцагчаас нягталж, тодруулалгүй явуулсан тухай Хаан банкнаас гаргасан албан баримтыг дэлгэжээ.