"ONDO” компанийн үүсгэн байгуулагчид хэрэглэгчдэдээ өөрсдийн эзэмшлийн хувиасаа бэлэг болгон олгох шийдвэр гаргасан. Энэ талаараа мэдээлэл өглөө.
"ONDO" ХХК-ийн Гүйцэтгэх захирал Б.Мандуул хэлэхдээ "Үнэнч хэрэглэгчдэдээ хувьцаагаа бэлэглэж буй нь Монгол Улсад анх удаа бий болж буй сайн жишиг. Монголд харилцаа холбооны салбар үүсэж хөгжсөнөөс хойш үүрэн телефоны 5 оператор байгуулагдсан. Үүний нэг нь ONDO. Бид хамтын өмчит компани болохоо зарлаж, энэ нь яг юу вэ гэдгийг "ONDO"-ийн хэрэглэгчдэдээ болон шинээр хэрэглэгч болохоор зэхэж буй хүмүүстээ ойлгуулахыг зорьж байна" гэлээ.
Үргэлжлүүлэн тэрбээр "ONDO"-г өнөөдрийн байдлаар 260 мянга гаруй хэрэглэгч ашиглаж байна. Бид сүлжээнийг өргөтгөлөө цаг ямагт хийж байгаа. Хэдийгээр өвөл болоод, гадаа хүйтэн байгаа ч гэсэн Дархан, Эрдэнэт, Өмнөговь гэх байршилд шилэн кабелийн баазуудыг угсрах ажил үргэлжилж буй. Мөн Улаанбаатар хот дахь ачаалал ихтэй, интернэтийн хурд нэмэх шаардлагатай бүсүүдэд өргөтгөлөө хийнэ" гэсэн юм.
