Энэ жил Архангай аймгийн 100 жилийн ой тохиож буй. Ойн хүрээнд хийх соёл урлаг, соёл, аялал жуулчлалын цогц эвентийн талаар мэдээлж байна. Энэ үеэр жүжигчин Э.Цолмонбаяр "Энэ жил Архангай аймгийн 100 жилийн ой тохиож байгаатай холбогдуулан аялал жуулчлалыг хөгжүүлэх зорилгоор нэг сарын хөтөлбөрийг боловсруулсан" гэлээ.

-Аялаж байгаа хүмүүстээ зориулаад долоодугаар сарын 1-5-ны хооронд "Монгол" УСК-г цацна-

Төслийн зөвлөх н.Чинбямба "Архангай аймгийн төвөөс 2.5 километрийн зайд RN complex аялал жуулчлал болон хөдөө аж ахуйн цогцолборыг байгуулж байгаа. Одоогоор бүр барилгын ажил дууссан. Тохижилтын ажил явагдаж байна. Түгжрэл байхгүй, зогсоолтой байх, өдөр бүр арга хэмжээтэй байхаар төлөвлөсөн. Өдөр бүр явуулын цирк болон амьтны хүрээлэнтэй байгаад Архангай аймгийн бизнес эрхлэгчидтэй хамтран 31 төрлийн хоолны сонголтуудтай байхаар төлөвлөн ажиллаж байна. Өнөөдөр бизнес эрхлэгчидтэй гэрээгээ байгуулж байгаа. "Монгол" уран сайхны киноны хэлэлцээр хийгээд долоодугаар сарын 1-5-ны хооронд RN complex-тоо цацах зөвшөөрлөө авсан. Аялаж байгаа хүмүүстээ бэлдэж байгаа гэсэн үг.

-НИСВАНИС: Долоодугаар сарын 21,22-ны өдрүүдэд амьд хөгжмийн наадам зохион байгуулна-

Нисванис хамтлагийн ахлагч Амгаа "Долоодугаар сарын 21,22-ны өдрүүдэд амьд хөгжмийн наадам зохион байгуулахаар болсон. Түүний ерөнхий найруулагчаар миний бие ажиллаж хамтлагуудаа оролцуулахаар бэлтгээд байна. Энэ амьд хөгжмийн наадамд энэ цаг үеийн шилдэг хамтлагууд оролцоно. Шинэ стадионд шинэ хөгжмийн дуугаралттай орчинд амьд хөгжмийн тоглолт хоёр өдөр үргэлжилнэ. Бүх амьд хөгжмийн сонсогчдоо урьж байна" гэв.

-Э.Төрмандах: Долоодугаар сарын 7-нд нийтийн дуучдын шоу тоглолт болно-

Дуучин Э.Төрмандах "Нийтийн дуучдаа төлөөлж 15-16 уран бүтээлч долоодугаар сарын 7-ны өдөр тоглолт хийж, уран бүтээлээ хүргэнэ. 2023 онд Монгол орон даяар "Малчид дуулж байна" уралдаанд тэргүүлсэн шилдэг гурван дуучин оролцоно. 19.00 цагаас нийтийн дуучдын шоу тоглолтод урьж байна" гэлээ.

-ЛЮМИНО: Долоодугаар сарын 14-нд бүрэн хэмжээний тоглолтоо хийнэ-

Люмино хамтлагийн дуучин Бажи "Люмино хамтлаг долоодугаар сарын 14-нд бүрэн хэмжээний тоглолтоо хийнэ. Люмино хамтлагийн анх удаа гадаа хийж байгаа том хэмжээний анхны тоглолт" гэв.