Боловсрол, Шинжлэх Ухааны сайд бөгөөд Цахим Хөгжил, Харилцаа Холбооны сайдын үүрэг гүйцэтгэгч Л.Энх-Амгалан өнөөдөр Засгийн газрын шийдвэрийг танилцуулж, мэдээлэл хийсэн. Энэ үеэр хичээл, сургуулийн шинэ жил хэзээ эхлэх талаар мэдээллээ.

Тэрбээр "Их, дээд сургууль болон МСҮТ-ийн хичээлийг долоо хоногийн өмнө эхлүүлнэ. Ерөнхий боловсролын сургуулийн хичээл хуулийн дагуу есдүгээр сарын 1-нд эхлэх зохицуулалттай тул энэ хугацаанд эхэлнэ. Гэвч ачаалал өндөртэй, түгжрэлд нөлөөлдөг тодорхой байршлууд дахь 20 орчим сургуулийн хичээл эхлэх болон тарах цагийг 15-30 минутаар өөрчилнө.

Хичээл эхлэх үед 1.2 сая хүүхдийн хөдөлгөөн эхэлдэг тул КОВИД-19-ийн халдвар дахин дэгдэх эрсдэл байна. Гэхдээ бид хичээл сургалтыг хугацаанд нь эхлүүлэх бөгөөд хүүхдэдээ вакцин хийлгэх шаардлага тавихгүй. Харин сургууль, цэцэрлэгийн хүүхдүүдийг амны хаалттай байлгахад эцэг эх, асран хамгаалагчид нь анхаараасай гэж хүсэж байна" хэмээлээ.