Эмээлт дэх махны үйлдвэрүүдийн асуудлаар Шадар сайд С.Амарсайхан мэдээлэл өглөө. Тэрбээр "Эмээлтэд 32 ААН үйл ажиллагаа явуулж байна. Мах экспортолдог 60 ААН бий. Үүний 31 нь БНХАУ руу мах экспортлох эрхтэй. Үүнээс 17-г нь түр лацдаж хаасан. Тодруулбал, тавдугаар сарын 11-нээс хяналт шалгалт хийж, махны экспорт хийж байгаа үйлдвэрүүдийн үйл ажиллагааг 14 хоногийн хугацаанд хааж, нэг нэгээр нь эрсдлийн үнэлгээ хийнэ" гэв.

Ингээд сэтгүүлчдийн сонирхсон асуултад хариуллаа.

-Хятад эзэдтэй "Эмээлтийн мах"-ны үйлдвэрийн асуудлыг хэзээ шалгаж дуусах вэ. Бодис хольсон гэх махнуудыг Хятад руу экспортлох гэж байсан гэх МХЕГ-ынхандаа хариуцлага тооцох уу. Монгол иргэд идсэн бол яах вэ?

-МХЕГ тогтмол хяналт шалгалтаа тавих ёстой. Ялангуяа хүний эрүүл мэндтэй холбоотой асуудалд анхаарах ёстой. Тавдугаар сарын 11-нээс хойш шалгалт хийж буй. Ингэхдээ стандарын дагуу үйл ажиллагаа явуулж үйлдвэрүүддээ хариуцлага тооцохгүй. Харин дүрэм журам зөрчиж буй үйлдвэрүүдэд арга хэмжээ авах ёстой. Өнгөрсөн хугацаанд махны стандарт чанар, аюулгүй байдалтай хамааралтай олон асуудал яригдаж ирсэн. Эмээлтийн асуудал анх удаа яригдаж байгаа юм биш. Олон жилийн өмнөөс яригдаж ирсэн. Хяналт шалгалт хийж байгаа нэртэй, хууль зөрчсөн, үгсэж хуйвалдсан асуудал ч байдаг. Тиймээс энэ удаагийн шалгалтыг олон нийтэд нээлттэй зарласан. Олон талын хяналт дор хийж, зохион байгуулалтад оруулахаар зарласан.

Засгийн газраас ажлын хэсэг байгуулж, хүнсний аюулгүй байдалтай холбоотойгоор МХЕГ-ын үйл ажиллагааг цэгцлэх ажлууд хийгдэж эхэлсэн.

Өмнө нь хяналт шалгалт хийгдэж байсан. Хангалтгүй байсан учир МХЕГ, ШӨХТГ-ын удирдлагуудыг сольж байсан.

-Бодис хольсон мах сургууль цэцэрлэгүүдэд нийлүүлэгдсэн байх вий. Үүнд ямар хяналт тавьж байгаа вэ?

-Нийт хүн амын хэрэглээнд энэ шаардлага хангаагүй мах нийлүүлэгдсэн байх вий гэсэн иргэдийн болгоомжлол бий. МХЕГ болон холбогдох байгууллагаас эдгээр махууд хэрэглээнд буюу дотоодын хүнсний үйлдвэрлэлд ашиглагдахгүй байгаа гэдэг мэдээлийг өгсөн. Энэ бол баталгаатай гэсэн. Төр хяналтгүй огт хаяагүй. Хяналтаа тавьж байна. Гэхдээ алдаатай асуудал их байна.

Хүнсний аюулгүй байдал бол нээлттэй аюулгүй, ил тод байх ёстой. Далд байдлаар үйл ажиллагаа явуулдаг асуудлыг ил болгоё гэж байгаа.