Энэ сарын 25-ны 19.00 цагийн орчимд Төв аймгийн Мөнгөнморьт сумын “Минжийн Хангай” гэх газар ОХУ-ын талаас Монгол Улсын хилийн 740-741 дүгээр тэмдэгтийн дагуу ойн түймэр хил давж орж ирсэн. Дуудлагын дагуу ОБЕГ-ын тэргүүн дэд бөгөөд штабын даргын шийдвэрээр Агаараас эрэн хайх, аврах 111 дүгээр ангийн “ЕС-145” загварын нисдэг тэрэг Сэлэнгэ аймгийн Хүдэр, Хэнтий аймгийн Батширээт сумын зааг Минжийн хангайд ОХУ-ын талаас Улсын хил давж орж ирсэн ойн түймрийг агаараас тандах, түймрийн зураглал гаргах, Үндэсний аврах бригад, Төв аймгийн Онцгой байдлын газар, НОБГ-ын Багануур дүүргийн Онцгой байдлын хэлтсийн алба хаагчдыг түймрийн голомтод тээвэрлэн хүргэхээр энэ сарын 07:36 цагаас эхлэн 05.27-ны өдрийн 13:00 цаг хүртэл нийт 9 удаагийн нислэгийг үйлдсэн байдаг.

Агаараас эрэн хайх, аврах 111 дүгээр ангийн “ЕС-145” загварын нисдэг тэрэг 05.27-ны өдрийн 13:34 цагт түймрийн голомтоос Улаанбаатар хотын чиглэлд хөөрч, мөн өдрийн 14:32 цагт ангийн байрлалд газардсан. Түймрийг 05.27-ны өдрийн 18:16 цагт цурамд оруулж, 05.29-ны өдрийн 21:37 цагт бүрэн унтрааж, Хилийн цэргийн 303 дугаар ангийн Минжийн заставын сургалтын орлогчид хүлээлгэн өгсөн байна. Түймрийн голомтод үүрэг гүйцэтгэсэн алба хаагчдыг зөөвөрлөн авчрахаар “ЕС-145” загварын нисдэг тэрэг энэ сарын 30-ны буюу өнөөдөр 07.17 цагт хөөрсөн байна.