Ирэх арваннэгдүгээр сард бүх нийтээр амрах хоёр өдөр тохиож байна. Монголчууд Чингис хааны төрсөн өдрийг өвлийн тэргүүн сарын шинийн 1-нд тэмдэглэж, бүх нийтээр амардаг. Энэ өдөр арваннэгдүгээр сарын 5-ны баасан гарагт таарч байна.

Мөн арваннэгдүгээр сарын 26-нд Бүгд найрамдах улс тунхагласан өдрийг бүх нийтийн амралтын өдөр болгон тэмдэглэдэг нь бас баасан гарагт таарч байгаа юм.

Тодруулбал монголчууд эл хоёр өдөрт бүх нийтээрээ амрах хуультай. Учир нь Их Эзэн Чингис хаан мэндэлсэн билгийн тооллын өвлийн тэргүүн сарын шинийн 1-ний өдрийг нийтээр тэмдэглэх баярын өдөр болгож, 2012 онд Нийтээр тэмдэглэх баярын болон тэмдэглэлт өдрүүдийн тухай хуульд өөрчлөлт оруулжээ. Энэ жил Их эзэн Чингис хааны мэндэлсний 859 жилийн ой тохиох аж.